ژیان لەگەڵ پیکێ، شاکیرا دەباتە زیندان

 

 

شاکیرای هاوسەری پێشووی جێرارد پیکێی یاریزانی پێشووی یانەی بارسێلۆنا، بە تاوانی خۆدزینەوە لە باج تۆمەتبارکراوە و بەپێی هەواڵەکان، گۆرانیبێژە کۆڵۆمبییەکە خۆی لە پێدانی 14.5 ملیۆن یۆرۆ دزیوەتەوە.

 

شاکیرا تۆمەتبارکراوە بەوەی لە ساڵانی 2012 بۆ 2014 ماوەی زیاتر لە شەش مانگ لە ئیسپانیا ماوەتەوە و بەمەش دەبێت وەك هەر هاوڵاتییەکی وڵاتەکە باج بە حکومەت بدات. بەپێی پێشبنییەکان لە ئەگەری ساخبوونەوەی تۆمەتەکە، هەشت ساڵ زیندانی بەسەر گۆرانیبێژەکە دەسەپێنرێت و بە بڕی 24 ملیۆن یۆرۆ سزا دەدرێت. 

 

شاکیرا بە تووندی ئەو تۆمەتانە رەتدەکاتەوە و رایگەیاند کە ئەو لەو دوو ساڵەدا زۆربەی کاتەکانی لە وڵاتی بەهاماس بەسەربردووە و باجەکانی لەو وڵاتە داوە. گۆرانیبێژە کۆڵۆمبییەکە راشیگەیاند کە ئەو ماوەیەی لە ئیسپانیا بووە، ئەو بڕە پارەیەی داوە کە حکومەتی وڵاتەکە داوای لێکردووە و بەهیچ شێوەیەك خۆی لە باجدان نەدزیوەتەوە. 

 

لە رابردوودا لە وڵاتی ئیسپانیا چەندین یاریزانی بەنێوبانگی وەك لیۆنێڵ مێسی، کریستیانۆ رۆناڵدۆ و دیێگۆ کۆستا بە تاوانی خۆدزینەوە لە باج تۆمەتبارکرابوون و هەرسێ یاریزانەکە بە پێدانی ملیۆنان یۆرۆ کەیسەکەیان داخست، بەڵام شاکیرا رەتی کردووەتەوە هیچ بڕە پارەیەك بدات و دەیەوێت لە دادگا کەیسەکە یەکلایی بکاتەوە. 

 

ساڵی 2011 دوای ئەوەی پەیوەندی لەگەڵ جێرارد پیکێی یاریزانی پێشووی بارسا و هەڵبژاردەی ئیسپانیا درووستکرد، شاکیرا دەچێتە ئیسپانیا و ماوەی 11 ساڵ لەو وڵاتەدا دەمێنێتەوە. بەڵام ساڵی رابردوو لەیەکدی جیابوونەوە و شاکیرا هەر دوو منداڵەکەی دەبات و بۆ شاری مەیامی ئەمریکا دەڕوات و لەو کاتەوە لەو شارە دەمێنێتەوە.