رووداو دیجیتاڵ
لە دێربیی میلانۆدا، ئینتەرمیلان رکابەرە هاوشارییەکەی تێکشکاند و بلیتێکی یاریی کۆتایی جامی ئیتاڵیای بەدەستهێنا.
ئینتەرمیلان لە یاریی گەڕانەوەی قۆناخی پێشکۆتایی جامی ئیتاڵیادا میوانداری میلانی کرد و لە هەموو روویێکەوە بەسەریدا زاڵ بوو، دەرئەنجام 3-0 لێیبردەوە و گەیشتە یاریی کۆتایی، بەو پێیەی هەردوو یانە لە یاریی چووندا بەبێ گۆڵ یەکسانبووبوون.
لاوتارۆ مارتینێزی هیرشبەری ئەرجەنتینی دوای چاکبوونەوە لە پێکانەکەی، زۆر بەهێز گەڕایەوە و هەر لە خولەکی 4 و لە یەکەم هێرشی نیراتزۆریدا تۆڕی گۆڵی میلانی هەژاند.
هەمان یاریزانی ئەرجەنتینی 4 خولەک پێش کۆتاییهاتنی نیوەی یەکەم گۆڵی دووەمی خۆی و یانەکەی تۆمارکرد و نیوەی یەکەم بە پێشکەوتنی ئینتەرمیلان بە دوو گۆڵی بێوەڵام کۆتاییهات.
لە نیوەی دووەمدا پلان و گۆڕانکارییەکانی ستیفانۆ پیۆلی هیچ شتێکیان نەگۆڕی و میلانییەکان نەیانتوانی تۆڕی گۆڵی ئینتەرمیلان بهەژێنن، بەڵکو رۆبن گۆسینس لە خولەکی 82ـدا گۆڵی سێیەم و یەکلاکردنەوەی بۆ نیراتزۆری تۆمارکرد و گەیشتنە فایناڵ.
ئینتەرمیلان لە یاریی کۆتایی جامی ئیتاڵیادا، رووبەڕووی براوەی یاریی نێوان یوڤێنتوس و فیۆرێنتینا دەبێتەوە، کە ئەمشەو یارییەکە لەسەر یاریگەی ئەلیانز ستادیۆم لە تۆرینۆ بەڕێوەدەچێت، کە لە یاریی چووندا یوڤێنتوس بە گۆڵێکی بێبەرامبەر سەرکەوتنی بەدەستهێناوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ