رووداو دیجیتاڵ
کارلۆس چاندیا ئالارکۆنی ناوبژیوانی پێشووی نێودەوڵەتی کە لەدایکبووی چیلییە، ئاشکرایکردووە لە یەکێک لەو یارییانەدا کە مێسی بەشداری تێدا کردووە، سکانداڵێکی گەورەی ئەنجامداوە، بۆ ئەوەی خاتری مێسی بگرێت و لە کۆتاییدا درێسەکەی لیۆی بەدەستهێناوە.
ئەوەی ناوبژیوانەکە باسیکردووە، لە یارییەکی هەڵبژاردەی ئەرجەنتین بووە لە کۆپا ئەمێریکای 2007.
ئەوکات مێسی لەگەڵ هەڵبژاردەی ئەرجەنتین یارییدەکرد و رووبەڕووی هەڵبژاردەی مەکسیک دەبوونەوە. وەک ناوبژیوانەکە دەڵێ، مێسی بەدەست، رێگەی لە هێرشێکی مەکسیکییەکان گرت و بەدەستی تۆپەکەی لەژێر کۆنترۆڵی ئەوان دەرهێنا، بەڵام ئەوکات ئەنجامی یارییەکە سێ گۆڵی بێبەرامبەر بوو بۆ ئەرجەنتین. و تەنیا چەند خولەکێک مابوو یارییەکە تەواو ببێت.
چاندیا لە لێدوانی بۆ میدیای چیلی گوتوویەتی "من بینیم کە مێسی تۆپەکەی بەدەست دوورخستەوە و بەئەنقەست وایکرد، ئەگەر کارتی زەردم بدایەتێ، نەیدەتوانی بەشداری لە یاریی کۆتایی بکات بەرامبەر بەرازیل".
هەروەها دەڵێ، "چوومە لای مێسی و پێمگوت، ئەوەی کرد بەپێی یاسا شایستەی کارتی زەردە، بەڵام بڕیاری من ئەوەیە کە کارتە زەردەکەت نادەمێ، بەڵام درێسەکەتم دەوێت".
ئەو ناوبژیوانە ئاشکرایکردووە، دوای یارییەکە روویکردووەتە ژووری جلگۆڕینی یاریزانانی هەڵبژاردەی ئەرجەنتین و درێسەکەی مێسی بەدەستهێناوە وەک پاداشتی پێنەدانی کارتە زەردەکە.
چاندیا دەڵێ، "لەڕاستیدا مێسی دەیویست لە نێو یاریگە و هەر دوای تەواوبوونی یارییەکە راستەوخۆ درێسەکەم بداتێ، بەڵام من پێمگوت نا نا، بیبە ژووری جلگۆڕین و من خۆم دوایی دێم دەیبەم".
یاریی کۆتایی کۆپا ئەمێریکای 2007 بەسەرکەوتنی هەڵبژاردەی بەرازیل بە سێ گۆڵی بێبەرامبەر کۆتاییهات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ