رووداو دیجیتاڵ
عەلی خامنەیی، رابەری کۆماری ئیسلامیی ئێران، جارێکی دیکە رەتیکردەوە رێگە بە وەرزشوانانی ئێران بدات رووبەڕووی هیچ رکابەرێکی ئیسرائیلی ببنەوە، دووپاتیشکردەوە کە پشتگیری لە هەر وەرزشوانێک لە هەر رەگەز و نەتەوەیەک دەکەن کە ئامادەنەبێت بەرامبەر وەرزشوانە ئیسرائیلییەکان یاری بکات.
عەلی خامنەیی، لە لێدوانێکدا، رایگەیاند "قەوارەی زایۆنیزمی خوێنڕێژ و ناشەرعی هەوڵدەدات لە رێگەی بەشداریکردن لە بۆنە وەرزشییە نێودەوڵەتییەکاندا شەرعیەت بەخۆی بدات، گەورە وەبەرهێنەرانی جیهان و شوێنکەوتووەکانیشیان پشتیوانیان لێدەکەن".
رابەری کۆماری ئیسلامیی ئێران، لە کاتی پێشوازیکردنی لەو وەرزشوانە ئێرانییانەی میدالیایان لە ئۆڵیمپیاد و پاراڵیمپیکی تۆکیۆدا بەدەستهێناوە، گوتی "هیچ وەرزشوانێکی ئازاد رازی نابێت دان بە قەوارەی زایۆنیزمدا بێنێت و تەوقەی لەگەڵ بکات لەپێناو بەدەستهێنانی میدالیایەک".
عەلی خامنەیی، ئاماژەی بۆ ئەوەکرد کە دان نەنان بە ئیسرائیل لە یاریگەکانی وەرزشدا پرسێکی زۆر گرنگە.
زۆرجار وەرزشوانانی ئێران لە بۆنە و پاڵەوانێتییە وەرزشییەکاندا رەتیانکردووەتەوە رووبەڕووی وەرزشوانانی ئیسرائیل ببنەوە، چ بە کشانەوە یان بانگەشەکردن بۆ ئەوەی کە تووشی پێکان بوونە.
تەنانەت زۆر لە وەرزشوانانی عەرەب و موسڵمانیش بەهەمان پاساو ئامادە نەبوونە بەرامبەر رکابەرە ئیسرائیلییەکانیان یاری بکەن، کە دوایینیان فەتحی نوورینی یاریزانی جۆدۆی جەزائیری بوو لە ئۆڵیمپیادی تۆکیۆدا.
وەرزشوانانی ئێران لە ئۆڵیپیادی 2020ـی تۆکیۆدا 7 میدالیایان بەدەستهێنا، کە 3ـیان زێر بوون، لە پاراڵیمپیکی تۆکیۆشدا 24 میدالیایان لەملکرا، کە لەنێویاندا 12 زێڕ بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ