رووداو - هەولێر
یەکێتیی ناوەندی بالەی عێراق، کۆبوونەوەی بەشێوەی ئۆنلاین ئەنجامدا و وادەی دەستپێکردنی چالاکییەکانی وەرزیی داهاتووی دیاریکرد.
کۆبوونەوەکە بە بەشداری سەرۆک و سەرجەم ئەندامانی یەکێتییەکە بوو، سەرەتا بڕیاردرا هەموو سزای دارایی و کارگێڕی سەر یانە و یاریزانان هەڵبگیرێت، هەروەها ناوەندی پێگەیاندنی یاریزانانی بالە لە هەموو شارەکانی عێراق دەکرێنەوە.
یارییەکانی وەرزی نوێی خولی بالەی یانە پلەیەکەکانی عێراق رۆژی 22ی مانگی سێپتێمبەر دەستپێدەکات و هەفتەیەک بەردەوام دەبێت، کێبرکێکانی بە شێوازی چوار کۆمەڵە بەڕێوەدەچێت.
وەرزی رابردوو یانەی پێشمەرگەی سلێمانی بۆ دووەمجار لە مێژووی خۆیدا نازناوی خولی نایابی عێراقی بەرزکردەوە و نوێنەری عێراقە بۆ پاڵەوانێتی یانەکانی ئاسیا.
یەکێتیی بالەی عێراق بڕیاریدا یارییەکانی وەرزی نوێی خولی نایابی عێراق رۆژی 19ی مانگی نۆڤێمبەر دەستپێبکات و هەر یانەیەک دەبێت دوو یاریزانی ئاستی لاوان بەشداری پێبکات.
عەلا ساعدی، گوتەبێژی یەکێتیی بالەی عێراق، لە لێدوانێکی تایبەت بە تۆڕیی میدیایی رووداو رایگەیاند "یەکێتییەکەمان تەواو پابەندی رێنماییەکانی شانەی رووبەڕووبوونەوەی کۆرۆنایە و ئەو لایەنە لەبەرچاو دەگرین، هەروەها دەمانەوێت وەرزی داهاتوو رکابەرییەکی بەهێز لە نێوان یانە بەشدارەکان ببینین".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ