ڤێردێربرێمەن 1 - 4 بایرلیڤەرکوزن
رووداو - هەولێر
لە دوایین یاری یەکەم گەڕی دوای دەستپێکردنەوی بۆندێسلیگا، یانەی بایرلیڤەرکوزن بە ئەنجامێکی گەورە لە ڤێردێربرێمەنی بردەوە.
ڤێردێربرێمەن لەسەر یاریگەی خۆی میوانداری بایرلیڤەرکوزنی کرد و بە ئەنجامی 1 - 4 گۆڵ پێیدۆڕا، کە ئەمە حەوتەم دۆڕانە بەسەریەکەوە لەم وەرزەدا ڤێردێربرێمەن لەسەر یاریگەی خۆی تووشی دەبێت.
کای هاڤێرتز لە خولەکی 28دا گۆڵی پێشکەوتنی بۆ لیڤەرکوزن تۆمارکرد.
ڤێردێربرێمەن زۆر چاوەڕێی نەکرد و دوای تەنیا دوو خولەک لە رێگەی تیۆدۆر جیبراسیلاسەوە گۆڵی بەرامبەربوونی بەدەستهێنا، بەڵام کای هاڤێرتز جارێکی دیکە نەیهێشت دڵخۆشیی خاوەن یاریگە درێژە بکێشێت و دوای 3 خولەک گۆڵی دووەمی خۆی و یانەکەی تۆمارکرد.
لە نیوەی دووەم و لە خولەکی 61دا میشێل ڤایسێر گۆڵی دڵنیایی بۆ لیڤەرکوزن تۆمارکرد.
تیپی میوان بەوەندەش رانەوەستا و کەریم دێمیربای یاریزانی تورکی لە خولەکی 78دا گۆڵی چوارەمیشی کرد و 3 خاڵی یارییەکەیان لەگەڵ خۆیاندا بردەوە شارەکەیان.
بەم سەرکەوتنە بایرلیڤەرکوزن بە کۆکردنەوەی 50 خاڵ لە پلەی پێنجەمی ریزبەندی خولەکە مایەوە، ڤێردێربرێمەنیش بە 18 خاڵ لە پلەی حەڤدەم و پێش کۆتایی ریزبەندی مایەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ