پارتی قبوڵی ناکات
رووداو دیجیتاڵ
بەگوێرەی میدیاکانی بەریتانیا، تۆماس پارتی، یاریزانی غانی، ترسی هەیە لە لەدەستدانی جێگەی خۆی لە پێکهاتەی سەرەکی ئارسیناڵدا، بۆیە بیر لە رۆیشتن لە یانە لەندەنییەکە دەکاتەوە، چونکە قبوڵناکات یاریزانی یەدەگ بێت.
وەک ئەو سەرچاوانە باسی دەکەن، ئەگەری ئەوە هەیە یاریزانەکە لە ئارسیناڵ بڕوات ئەگەر چیدی بەشێک نەبێت لە پێکهاتەی سەرەکی میکێل ئارتێتای راهێنەر.
پێشتر باس لەوە کرابوو کە ئەگەری هەیە پارتی تەنانەت دوای پشووی نێودەوڵەتیش، لە مانگی تشرینی یەکەمدا بەهۆی پێکانەوە لە رانیدا بەشداری لە یارییەکاندا نەکات.
ئەستێرەی نێودەوڵەتی غانا، وەرزی 2023-2024 لە پۆستی بەرگریکاری باڵی راست دەستپێکرد، کە پارتی دوای گرێبەستکردنی یانەکە لەگەڵ دیکلان رایس لەسەر ئەو رۆڵە رانەهاتووە، چونکە شوێنی دڵخوازی ئەو یاریکردنە وەک یاریزانی هێڵی ناوەڕاستی بەرگریکار.
لەو کاتەوە میکێل ئارتێتا تواناکانی بن وایتی لە پۆستی بەرگری باڵی راستی بەدەستهێنایەوە، گابرێل ماگالهایس گەڕایەوە پۆستی بەرگریکاری ناوەڕاست، چونکە ئارسیناڵ بەرامبەر مانچێستەر یونایتد بە 3 گۆڵ بەرامبەر بە گۆڵێک سەرکەوتنی بەدەستهێنا.
تۆماس پارتی ترسی ئەوەی هەیە بۆ یەکەمجار لەو کاتەوەی سێ ساڵ لەمەوبەر پەیوەندی بە یانەکەوە کردووە چیدی بەشێک نەبێت لە پێکهاتەی سەرەکی ئارسیناڵ.
بەپێی میدیاکانی بەریتانیا، لەوانەیە تۆماس پارتی لە مانگی یەکدا بیر لە جێهێشتنی ئارسیناڵ بکاتەوە، ئەگەر پەیوەندییەکی باشی لەگەڵ ئارتێتا نەبێت، ئەمەش لەکاتێکدایە کە قسە و باس لەسەر ئەوە هەیە کە یانەی یوڤێنتوسی ئیتاڵی بیر لە گرێبەستکردن لەگەڵ پارتی دەکاتەوە.