رووداو دیجیتاڵ
ئەمڕۆ سێشەممە، دەستەی خولی تۆپی پێی ئیسپانیا، وادەی یارییەکانی وەرزی نوێی 2024-2025ـی لالیگای بە بەشداری 20 یانە ئاشکراکرد. هەروەها وادەی یارییەکانی ئیلکلاسیکۆی نێوان ریال مەدرید و بارسێلۆنا لەگەڵ وادەی یارییەکانی دێربیی مەدرید دیاریکران.
بەپێی ئەوەی لالیگا رایگەیاندووە، پێشبڕکێکانی وەرزی نوێی خولی ئیسپانیا لە 18ـی مانگی ئابی داهاتوو دەستپێدەکەن و لە 25ـی مانگی ئایاری 2025 کۆتایی دێن.
ریال مەدرید وەک پاڵەوانی بەرگریکار دەچێتە وەرزی نوێ، دوای ئەوەی وەرزی رابردوو بۆ جاری 36 لە مێژووی خۆیدا لالیگای بردەوە.
مێرینگێ ئەو تیپەیە کە زۆرترین نازناوی لالیگای بەدەستهێناوە، لە پلەی دووەمیشدا بارسێلۆنا دێت بە بردنەوەی 27 نازناو و ئاتلێتیکۆ مەدرید سێیەمە و خاوەنی 11 نازناوە.
ریال مەدرید نازناوی وەرزی رابردووی خولەکەی بەدەستهێنا دوای ئەوەی 95 خاڵی کۆکردەوە و بە 10 خاڵی تەواو لەپێش بارسێلۆنای دووەمی خولی ئیسپانیاوە بوو.
وادەی یارییەکانی کلاسیکۆی نێوان ریال مەدرید و بارسێلۆنا لە لالیگادا، بۆ وەرزی 2024-2025 راگەیێندرا.
بڕیارە لە 27ـی تشرینی یەکەمی ئەمساڵدا، یاریی یەکەمی ئیلکلاسیکۆ، لە قەڵای مێرینگێ، یاریگای سانتیاگۆ بێرنابیۆ بەڕێوەبچێت.
سەبارەت بە ئیلکلاسیکۆی قۆناخی دووەمیش، لە 11ـی ئایار لە یاریگای مۆنتجویک بەڕێوەدەچێت، چونکە تاوەکو ئەوکات کارەکانی گەورەکردن و نۆژەنکردنەوەی کامپ نو تەواو نابن.
سەبارەت بە یارییەکانی دێربیی مەدرید لەنێوان ریال مەدرید و ئاتلێتیکۆ مەدریدی دراوسێیدا، یەکەم دێربیی لە گەڕی هەشتەمی خولەکەدا دەبێت لە یاریگای واندا میترۆپۆلیتانۆ، لە 29ـی ئەیلوولی 2024.
لە کاتێکدا یاریی قۆناخی دووەم لە یاریگای سانتیاگۆ بێرنابیۆ دەبێت، کە گەڕی 23ـی لالیگا، لە رۆژی 9ـی شوباتی 2025.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ