دێربیی ریاز.. رۆناڵدۆ بەهێزترین یاریی دەکات

 

لە رکابەرییەکانی خولی سعودیە و لە یارییەکانی گەڕی 25ـی خولەکەدا، لە یاریگەی شا فەهد، یانەی هیلال میوانداریی یانەی نەسڕ دەکات، یاریگەکە 68 هەزار هاندەر دەگرێت و چاوەڕواندەکرێت زۆرترین هاندەر ئامادەی یارییەکە ببن.

 

ئەم یارییە یەکەم یاریی نەسڕە، دوای دوورخستنەوەی رودی گارسیا، راهێنەری فەرەنسی لە پۆستی راهێنەرایەتی یانەکە، بۆیە دێنکۆ ژێلیچیچ، راهێنەری کرواتی و تیپی لاوانی یانەکە بەشێوەیەکی کاتی راهێنەری یانەی نەسڕ دەبێت تاوەکو دەستنیشانکردنی راهێنەری نوێ بۆ یانەکە، کە ناوی چەند راهێنەرێکی گەورە بە یانەکە بەستراوەتەوە، لەوانەش زیدان و مۆرینیۆ.

 

بەر لەم یارییە یانەی نەسڕ لە پلەی دووەمی ریزبەندی خولەکەیە بە 53 خاڵ و 3 خاڵ لە یانەی ئیتیحادی یەکەمی ریزبەندی خولەکەوە دوورە، یانەی هیلال ئەنجامەکانی وەک پێویست نین و بە کۆکردنەوەی 46 خاڵ لە پلەی چوارەمی ریزبەندە و لە سێ یاریی رابردووشدا هیچ یارییەکی نەبردووەتەوە.

 

یارییەکە رکابەرییەکی لە مێژینەی نێوان هەردوو یانەیە، بەڵام پەیوەندیکردنی کریستیانۆ رۆناڵدۆ بە نەسڕەوە، یارییەکە دەباتە قۆناخێکی دیکەوە.

 

جگە لەوەی هەردوو یانە گەورە و بەنێوبانگن، لە رکابەریکردن لەسەر گۆڵکاری یانەکەش دوو یاریزانی هەردوو یانە رکابەری یەکدی دەکەن، ئاندێرسۆن تالیسکای بەرازیلی لە یانەی نەسڕ خاوەنی 16 گۆڵە، ئودیۆن ئیهالۆی نەیجیری و یاریزانی یانەی هیلال بەهەمان شێوە 16 گۆڵی هەیە و لە پێشەنگی ریزبەندی گۆڵکارانی خولەکەدان.