ژووری جل گۆڕینی پاریس سانجێرمان بەپەلە داوای زیدان دەکات

 

 

راپۆرتە رۆژنامەڤانییەکانی فەرەنسا دەڵێن " دەستەی کارگێڕیی یانەی پاریس سانجێرمانی فەرەنسی بیر لە دوورخستنەوەی کریستۆڤ گالتێ، راهێنەری یانەکەیان دەکەنەوە لە ئەگەری کرانە دەرەوەیان لە خولی یانە پاڵەوانەکانی ئەوروپا و دۆڕانیان بەرامبەر یانەی بایرن میونشن."

 

رۆژنامەی لی 10 سپۆرتی فەرەنسی دەڵێت " رەوتی نێو ژووری جل گۆڕینی یانەی پاریس سانجێرمان بەرەو ئەوەیە کە زیدان بەشێوەیەکی بەپەلە بکرێتە راهێنەری یانەکە."

 

بەپێی سەرچاوەکە ئەستێرەیەکی بەنێوبانگ لە تیپەکەدا لە ژووری جل گۆڕینی گوتوویەتی " زیدان ئەمڕۆ ببێتە راهێنەری یانەکە، باشترە لە سبەی."

 

زینەدین زیدان، ماوەیەکی زۆرە لە دوای وازهێنانی لە راهێنەرایەتی یانەی ریال مەدرید بەبێ کار ماوەتەوە، هەرچەند ناوی بە چەند یانە و هەڵبژاردەیەک بەسترابووەوە، بەڵام راهێنەرەکە هیچ پۆستێکی وەرنەگرت.

 

راپۆرتە رۆژنامەڤانییەکان دەڵێن " زیدان رایگەیاندووە کە بەمزووانە دەگەڕێتەوە، بەڵام ئاماژەی بەوە نەداوە کە لە کوێ و چ پۆستێک وەردەگرێت."

 

پاریس سانجێرمان یاریی چوونی قۆناخی شازدەی چامپیۆنزلیگی بە گۆڵێکی بێبەرامبەر بە یانەی بایرن میونشن دۆڕا، دۆڕانیان لە یاریی گەڕانەوەدا ئەوان لە چامپیۆنزلیگ دەباتە دەرەوە و کاریگەرییەکی زۆریشی لەسەر داهاتووی راهێنەری یانەکەیان و ئەستێرەکانی دەبێت.