رووداو دیجیتاڵ
دەستەی پزیشکی یانەی بارسێلۆنا، هەواڵێکی خۆش دەداتە هاندەرانی یانەکە و دوو ئەستێرەی لاوی تیپەکە بۆ یارییکردن ئامادەن.
رادیۆی کادێنا سێری ئیسپانی، رایگەیاند، دەستەی پزیشکی یانەی بارسێلۆنا، بەفەرمی گڵۆپی سەوزی بۆ هەریەکە لە گاڤی و فێرمین لۆپێز هەڵکرد و هەردوو یاریزانەکە بۆ یارییەکانی داهاتووی یانەکە ئامادەن.
لە دوو رۆژی رابردوودا، هەردوو یاریزانەکە بە کۆمەڵ بەشدارییان لە مەشقەکانی یانەکەدا کردووە و بەشێوەیەکی ئاسایی دەرکەوتوون.
جگە لەوەش چاوەڕواندەکرێت هەر ئەمڕۆ راپۆرتی پزیشکی گەڕانەوەی دانی ئۆلمۆ دەربچێت و ئەو یاریزانەش بۆ یارییەکەی رۆژی یەکشەممە بەرامبەر یانەی سێڤییا ئامادەبێت.
لە مەشقەکانی ئەمڕۆی یانەی بارسێلۆنا، هەریەکە لە رۆبێرت لیڤاندۆڤسکی و لامین یامالیش، بەشێوەیەکی ئاسایی مەشقیان کردووە و ئامادەن بۆ ئەو یارییە بەهێزەی گەڕی دەیەمی لالیگا.
بارسێلۆنا بە دەستپێکێکی زۆرباشدا تێدەپەڕێت، یانەکە لە سەرەتای وەرزەوە لە کۆی 9 یاریی لالیگا، 8 یاریی بردووەتەوە و لە پێشەنگی ریزبەندی خولەکەیە، سەرەڕای ئەوەی بەشێکی زۆری یاریزانەکانی تووشی پێکانبوون.
هاندەرانی بارسێلۆنا پێیانوایە بە گەڕانەوەی ئەو سێ یاریزانە، تیپەکەی فلیکی هێزێکی زیاتری دەبێت و باشتر دەتوانێت رکابەری لەسەر بەدەستهێنانی ئەنجامی باش بکات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ