سەرۆکی فیفا پیرۆزبایی لە عەدنان درجال دەکات

 

 

ئینفانتینۆ لە نامەیەکدا بۆ فیدراسیۆنی تۆپی پێی عێراق نووسیوویەتی " رۆشنبیری، کەسایەتی و ئەزموونی کارکردنت، بێگومان کاریگەرییەکی گرنگی لەسەر بەرەوپێشبردنی یارییە جوانەکەمان لە عێراق دەبێت."

 

سەرۆکی فیفا دەڵێت "متمانەم بە تۆپی پێی عێراق هەیە، ئێوە دەتوانن پشت بە پشتگیری من و فیدراسیۆنی تۆپی پێی جیهان ببەستن بۆ ئەوەی بگەن بەم ئامانجە."

 

ئینفانتینۆ لە نامەکەیدا بۆ عەدنان درجال زیاتر نووسیوویەتی "دەرگەی فیدراسیۆنی تۆپی پێ هەمیشە کراوەیە بۆ گفتوگۆکردن لەبارەی وەرزشەکەمان و بەرەوپێشبردنی، دەمەوێت پیرۆزباییەکەم بگەیێنیتە جێگرەکانی سەرۆک و هەموو ئەندامانی هەڵبژێردراو لەگەڵ ئێوە."

 

لە کۆتایی پەیامەکەیدا سەرۆکی فیفا دەڵێت "هیوای سەرکەوتن بۆ تۆ و تیمەکەت دەخوازم لەم ئاڵنگارییەی چاوەڕێتان دەکات، بۆ دروستکردنی دیمەنێک و میراتێک بۆ داهاتووی تۆپی پێی عێراق، چاوەڕێم بۆ ئەوەی لە نزیکەوە یەک ببینین."

 

لە هەڵبژاردنەکانی فیدراسیۆنی تۆپی پێی عێراقدا، کە رۆژی 14-9-2021 لە بەغدا ئەنجامدران، عەدنان درجال بە زۆرینەی دەنگ کە 48 دەنگی بەدەستهێنا وەک سەرۆکی نوێی فیدراسیۆنی تۆپی پێی عێراق هەڵبژێردرا و بۆ چوار ساڵی داهاتوو ئەو پۆستە بەڕێوەدەبات، دوای ئەوەی سەرکەوتنی بەرامبەر شەرار حەیدەر، سەرۆکی یانەی کەرخ بەدەستهێنا.

 

لە هەڵبژاردنەکاندا، عەلی جەبار، بە جێگری یەکەمی سەرۆکی فیدراسیۆنی تۆپی پێ و یونس مەحموود بە جێگری دووەمی سەرۆکی فیدراسیۆنەکە هەڵبژێردران.