بەفەرمی.. یانەی بارسێلۆنا لەسەر پرسی سکانداڵەکەی بارتۆمیۆ هاتە دەنگ
رووداو-هەولێر
یانەی بارسێلۆنا راگەیێندراوێکیان لەسەر پرسی تێوەگلانی سەرۆکەکەیان لە سکانداڵێکی گەورە بڵاوکردەوە و بە تووندی وەڵامی وەڵامیان دایەوە.
چیرۆکەکە لەوەوە سەرچاوی گرتووە کە ئاژانسی کادینا سێری ئیسپانی راپۆرتێکی بڵاوکردەوە کە گوایە جۆسێپ ماریا بارتۆمیۆی سەرۆکی یانەی بارسێلۆنا، گرێبەستێکی لەگەڵ کۆمپانییەکدا هەیە بە ناوی ئای ٣ ڤێنچەرس، "I3 Ventures"، کە ئەم کۆمپانیایە کاری ئەوەبووە کاریگەری لەسەر رای گشتی دروست بکات بە کردنەوەی چەند پەیج و ماڵپەڕێک لە لەوێوە هێرشیان کردووەتە سەر ئەستێرە و سیمبولەکانی یانەی بارسێلۆنا لە نموونەی مێسی، گواردیۆلا و چاڤی.
لە بڵاوکراوەکەی یانەی بارسێلۆنادا هاتووە: هەموو ئەو شتانە رەتدەکەینەوە کە یانەکەمان هیچ پەیوەندییەکمان بە کۆمپانیایەک یانیش سایت و پەیجێکەوە نییە کە هێرش بکاتە سەر ئەوانەی پەیوەندییان بە یانەکەمانەوە هەیە.
زیاتر هاتووە: ئێمە خاوەنی سیستەمێکین کە چاودێری هەموو ئەو نامە ئەرێنی و نەرێنییانە دەکات کە بۆ یانەکە دێن، یانیش پەیوەندیدارن بە کەسایەتییەکانی وەک یاریزان، کارگێڕی، سەرۆک، راهێنەر و ئەندامەکانمانەوە، لەو سۆنگەیەوە داواکارین ئەو هەواڵانەی بڵاوکراونەتەوە لایببەن و ئێمە بە مافی خۆمان دەزانین کە لە رێگەی یاساوە مامەڵە لەگەڵ هەموو ئەوانەدا بکەین کە ئەو بابەت و هەواڵانە لە دژی یانەکەمان بڵاودەکەنەوە.
سەرۆکی یانەی بارسێلۆنا لەوەوە تێوەگلاوە کە گرێبەستی لەگەڵ کۆمپانایاکەدا هەیە بۆ ئەوەی ناو ناتۆرە و بۆ ئەو کەسانە دروست بکات کە لە دژی مانەوەی ئەون لە سەرۆکایەتی یانەکە، بۆ نموونە هەواڵی ناڕاست لەسەر مێسی، چاڤی، گواردیۆلا، پیکێ، پویۆل و لاپۆرتای سەرۆکی پێشووتری بارسا، لە رێگەی ١٠٠ هەژماری خوازراو و فەیکەوە تۆمەتیان بۆ دروستکراوە و لە کەسایەتییان دراوە.