ئینتەر میلان بە زەحمەت بردیەوە
رووداو - هەولێر
یانەی ئینتەر میلان بردنەوەیەکی زەحمەتی بەدەستهێناو لە یانەی ئەیسی میلانی رکابەری دوورکەوتەوە.
لە گەڕی 24ـی خولی ئیتاڵیا، ئینتەر میلان لە سانسیرۆ پێشوازی لە سامپدۆریا کرد و یارییەکەشی بە ئەنجامی دوو گۆڵ بەرامبەر بە گۆڵێک لێبردەوە.
گێمی یەکەمی یارییەکە بەبێ گۆڵ کۆتاییپێهات.
لە گێمی دووەمدا و لە خولەکی 73دا دانیێلۆ دی ئامبرۆزۆ گۆڵی یەکەمی بۆ ئینتەر تۆمارکرد، وەڵامی سامپدۆریا تەنیا سێ خولەکی خایاند و مانۆلۆ گابیادینی ئەنجامەکەی راستکردەوە، بەڵام راجا ناینگۆلان سوور بوو لەسەر ئەوەی سێ خاڵی یارییەکە بۆ نێرازۆری بێت و لە خولەکی 78دا گۆڵی دووەم و بردنەوەی تۆمارکرد.
بەم بردنەوەیە ئینتەر لە پلەی سێیەم مایەوە بە کۆکردنەوەی 46 خاڵ و چوار خاڵ لە ئەیسی میلانی چوارەم دوورکەوتەوە، سامپدۆریاش 33 خاڵی هەیە و دەیەمە.