ریڤەرپلەیت
رووداو دیجیتاڵ
یاریگەی مونومێنتالە، ریڤەرپلەیت پێویستیی بە یەک خاڵە بۆ بردنەوەی نازناوی خولی ئەرجەنتین، هەزاران هاندەران بۆ ئاهەنگگێڕان ئامادەن و میوانەکەشیان ئیستودیانتێسە.
تەنیا یەک خولەک دوای دەستپێکردنی یارییەکە، لوکاس بێلتران گۆڵی پێشکەوتنی بۆ ریڤەر تۆمارکرد و هەر زوو هاندەرانی دڵخۆشکرد.
لە خولەکی 18 نیکۆلاس دێ لاکرۆز بەلێدانێکی بەهێز بۆ جاری دووەم تۆڕی گۆڵی یانەی میوانی هەژاند و ریڤەرپلەیتی زیاتر لە نازناوەکە نزیککردەوە.
هەر لە نیوەی یەکەمدا لێدانێکی سزا بۆ ریڤەرپلەیت هەژمارکرا، ئیزیکێل بارکۆ، سەرکەوتووانە لێدانەکەی جێبەجێکرد، گۆڵی سێیەمی ریڤەرپلەیتی تۆمارکرد و مارتن دیمیکێلێسی راهێنەر بە ئارامییەوە گەڕایەوە ژووری جل گۆڕین.
لە خولەکی 67 ماورۆ مێندێز، گۆڵێکی بۆ ئێستودیانتێس تۆمارکرد و ئەنجامەکەی کەمکردەوە، بەڵام هیچی لە بارودۆخەکە نەگۆڕی، ریڤەرپلەیت بە سێ گۆڵ بەرامبەر گۆڵێک نازناوەکەی بردەوە، بووە پاڵەوانی خولی ئەرجەنتین.
فیکەی کۆتایی یارییەکە لێدرا، یاریگەی مونومێنتال پڕبوو لە ئاهەنگ، فرمێسک و پێکەنین ئاوێتەی یەکدی بوون.
هەزاران هاندەری ریڤەر بەیەکەوە ئاهەنگیان گێڕا، یاریی ئاگرینیان بەرزکردەوە و یانەکە بۆ جاری 38ـەم لە مێژوویدا نازناوی خولی تۆپی پێی ئەرجەنتینی بەدەستهێنا و جیاوازییەکەی لەگەڵ بوکا جونیۆرزی نزیکترین رکابەری کردە 3 نازناو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ