یارییەکی چامپیۆنزلیگی ئاسیا دواخرا

 

 

فیدراسیۆنی تۆپی پێی ئاسیا، لە راگەیێنراوێکی فەرمیدا رایگەیاند، بەهۆی خراپی کەشوهەوا و ئەو گۆڕانکارییە خێرایەی لە ئیمارات روویداوە، یاریی چوونی قۆناخی پێشکۆتایی چامپیۆنزلیگی ئاسیا، لەنێوان هەردوو یانەی عەینی ئیماراتی و هیلالی سعودی بۆ رۆژی چوارشەممە دواخرا.

 

یارییەکە بڕیاربوو ئەمڕۆ ئێوارە کاژێر 19:00 لە یاریگەی هەزاع بن زاید لە شاری عەین بەڕێوەبچێت، بەڵام یارییەکە دواخرا.

 

بەپێی راگەیێنراوەکە، یاریی نێوان هەردوو یانە بۆ ماوەی 24 کاژێر دوادەخرێت و رۆژی چوارشەممە کاژێر 19:00 یارییەکە بەڕێوەدەچێت.

 

یانەی هیلالی سعودی لە دۆخێکی زۆرباشدا تێدەپەڕێت، 34 یارییە لەسەرجەم خول و پاڵەوانێتییەکاندا یانەکە هیچ یارییەکی نەدۆڕاندووە و بەو ئامانجەی نیوەی رێگەی گەیشتن بە یاریی کۆتایی ببڕێت چووەتە ئیمارات.

 

یانەی عەینی لە قۆناخی رابردوودا یانەی نەسڕی سعودیی لە چامپیۆنزلیگی ئاسیا دوورخستەوە و دەیەوێت بەرامبەر هیلال درێژە بە ئەنجامە باشەکانی بدات.