رووداو دیجیتاڵ
یانەی بارسێلۆنا ریمۆنتادایەکی بێوێنەی بەسەر ئاتلێتیکۆ مەدریددا کرد و پێشەنگی ریزبەندی لالیگای لە ریال مەدرید وەرگرتەوە.
بارسێلۆنا لە نێو میترۆپۆلیتانۆ بووە میوانی ئاتلێتیکۆ مەدرید و یارییەکەی بە 2 - 4 گۆڵ بردەوە، پاشئەوەی تاوەکو خولەکی 70 بەدوو گۆڵی بێبەرامبەر لەپاشبوو.
ئاتلێتیکۆ بەر لە کۆتاییهاتنی گێمی یەکەم بەگۆڵێکی جولیان ئەلڤارێز لە خولەکی 44 پێشکەوت. لە گێمی دووەمدا و لەپاش ماوەیەکی کەم لە هاتنە ناوەوەی، ئەلیکساندەر سۆرلۆس لە خولەکی 69 گۆڵی دووەمی ئاتلێتیکۆی تۆمارکرد.
تەنیا دوو خولەک پاش گۆڵی دووەمی ئاتلێتیکۆ، رۆبێرت لیڤاندۆڤسکی گۆڵی یەکەمی بارسای تۆمارکرد و دوای تەنیا شەش خولەک لەو گۆڵە، بەئەسیستی رافینیا، فیران تۆرێس گۆڵی یەکسانکردنەوەی ئەنجامەکەی تۆمارکرد.
بارسا هەلی پاشەکشەی یاریزانانی ئاتلێتیکۆ مەدرید و ماندووبوونی تیپەکەی قۆستەوە و بەتەواوی کۆنترۆڵی یارییکرد و لە خولەکی 91دا لامین یامال گۆڵی سێیەمی بارسا و کۆتاییهێنان بەخەونی ئاتلێتیکۆی تۆمارکرد.
لە کاتی زیادکراوی یارییەکە و لە خولەکی 97، فیران تۆرێسی گۆڵی دووەمی خۆی و چوارەمی بارسای تۆمارکرد و یارییەکەش 4 - 2 لەبەرژەوەندیی بارسێلۆنا کۆتایی هات.
بارسێلۆنا حەوتەم یاریی لەسەریەکی لە لالیگادا بردەوە و کۆی خاڵەکانی گەیاندە 60 خاڵ کە هاوتای ریال مەدریدی دووەمە، بەڵام بارسێلۆنا یارییەکی کەمتری ئەنجامداوە.
بارسێلۆنا خاوەنی بەهێزترین هێڵی هێرشبەری لالیگای ئەمساڵە بەتۆمارکردنی 75 گۆڵ.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ