ئیگا شیڤیاتیک
رووداو دیجیتاڵ
ئیگا شیڤاتیک، پێشەنگی ریزبەندی جیهان خۆی گەیاندە یاریی کۆتایی تێنسی ئیندیان وێڵز.
ئیگا رووبەڕووی مارتا کۆستیوکی ئۆکراینی بووەوە، سەرەتای یارییەکە تێنسزانە پۆڵەندییەکە پێشکەوت و کۆنتڕۆڵی یارییەکەی کرد، کۆمەڵەی یەکەمی بە شەش دوو بردەوە و پێشکەوت.
لە کۆمەڵەی دووەمدا، کۆستیوکی هیچی پێنەکرا، شیڤیاتیک هێزی خۆی دووپاتکردەوە، دوای کاژێرێک و 9 خولەک یارییکەی لە بەرژەوەندیی خۆی تەواوکرد و ئەو کۆمەڵەیەشی شەش یەک بردەوە و گەیشتە یاریی کۆتایی پاڵەوانێتییەکە.
لە یاریی کۆتاییدا ئیگا شیڤیاتیک دەیەوێت سیناریۆی ساڵی 2022 دووبارە بکاتەوە و بۆ جاری دووەم نازناوەکە بەدەستبهێنێت.
لە یاریی دووەمی قۆناخی پێشکۆتاییدا، کوکو گاوفی ئەمریکی و سێیەمی ریزبەندی جیهان رووبەڕووی ماریا ساکاریی یۆنانی و نۆیەمی ریزبەند بووەوە.
لە کۆمەڵەی یەکەمدا، ساکاری هەموو ئەمریکای سەرسامکرد و بە شەش چوار پێشکەوت.
کۆمەڵەی دووەم رکابەرییەکە گەیشتە لووتکە، لە کاتێکدا ماریا پێنج سێ لەپێشەوە بوو، کوکۆ گاوف بەهێزەوە گەڕایەوە و بە حەوت شەش ئەنجامەکەی راستکردەوە و یارییەکەی بردە کۆمەڵەی سێیەم.
لە کۆمەڵەی یەکلاکەرەوەدا ماندووبوون بە گاوفەوە دیاربوو و ساکاری بەوپەڕی ورە بەرزییەوە درێژەی دایە رکابەریکردن و کۆمەڵەکەی بە شەش دوو بردەوە و بە دوو کاژێر و 42 خولەک خۆی گەیاندە یاریی کۆتایی پاڵەوانێتییەکە.
لە یاریی کۆتاییدا ماریا ساکاری و ئیگا شیڤیاتیک، رکابەری لەسەر بردنەوەی نازناوەکە دەکەن و ماریا دەیەوێت بۆ یەکەمجار ببێتە پاڵەوانی ئیندیان وێڵز.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ