ئەمشەو گاتوزۆ و میلان لە جامی ئیتاڵیا دەردەکەون
رووداو - هەولێر
یانەی ئەیسی میلان چوارەم یاریی خۆی لەژێر سەرپەرشتی جینارۆ گاتوزۆ، راهێنەری نوێی یانەکەی ئەنجامدەدات، کاتێک لە قۆناخی شازدەی جامی ئیتاڵیا لەنێو یاریگە و هاندەرانی رووبەڕووی یانەی هێلاس ڤیرۆنا دەبێتەوە.
یارییەکە کاژێر 22:45 لەسەر یاریگەی سانسیرۆ ئەنجامدەدرێت و ئەو یانەیەی یارییەکە بباتەوە راستەوخۆ دەگاتە قۆناخی داهاتووی پاڵەوانێتییەکە و میلانیش دەیەوێت سوود لە یاریگە و هاندەرانی وەربگرێت و سەرکەوتنی بۆ قۆناخەکە یەکلاییبکاتەوە.
پێش ئەم یارییەش یارییەکی دیکە لە هەمان قۆناخی پاڵەوانێتییەکەدا دەکرێت و هەردوو یانەی فیۆرێنتینا و سامپدۆریا کاژێر 19:00 لەسەر یاریگەی ئارتیمۆ فرانکی رووبەڕووی یەکدەبنەوە.