مۆلەر: هیچ كاتێك بەرامبەر مێسی نەدۆڕاوم

رووداو - هەولێر

ئەمڕۆ یاریی كۆتایی مۆندیال لە نێوان ئەڵمانیا و ئارجێنتینا ئەنجامدەدرێت و تۆماس مولەری هێرشبەری ئەڵمانیاش رایدەگەیەنێت ئەو بەرامبەر مێسی هیچ كاتێك نەدۆڕاوە.

مولەری هێرشبەری ئەڵمانیا بڕوای گەورەی خۆی بە تیپەكەی پێشاندا كە دەتوانن سەركەوتن بەسەر تانگۆدا تۆماربكەن و نازناوی مۆندیالی بەڕازیل بەدەست بهێنن.

ئاماژەی بەوەشدا كە پێشتر هیچ كاتێك بەرامبەر لیۆنێل مێسی ئەستێرەی بارسیلۆنا و هەڵبژاردەی ئارجێنتینا نەدۆڕاوە.

مۆلەر بۆ رۆژنامەنووسان دوا وگوتی: هەموو تواناكانمان دەخەینەگەڕ و لە پێناو بردنەوەی مۆندیالدا دەجەنگین، پێشتر بەرامبەر مێسی نەدۆڕاوم و هیوام وایە ئەو سەركەوتنانە بەردەوامبن.

مۆلەر هەروەها گوتی: نازانم یاریی ئەمجارەمان چۆن دەبێت، پێموانییە وەكو یارییەكەی بەرامبەر بەڕازیل بێت، چونكە یاریی ئەمجارە داخراو و زەحمەت دەبێت.

تۆماس مولەر تەمەن 24 ساڵان، ئەستێرەی دیاری مانشافتە و ئێستا 5 گۆڵی لە مۆندیالی بەڕازیل تۆماركردووە و هەوڵی ئەوەدەدات ببێتە گۆڵكاری مۆندیال، كە تا ئێستا جەیمس رۆدرێگزی هێرشبەری كۆڵۆمبیا بە 6 گۆڵ لە پێشەوەی گۆڵكارانی مۆندیالە.

• به‌شی بكه‌ لە
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger