رووداو دیجیتاڵ
لە خولی یانەکانی ئەمریکا، بەرەبەیانی سبەی یانەی ئینتەرمەیامی لە یارییەکی بەهێزدا لە دەرەوەی یاریگەی خۆی رووبەڕووی یانەی سپۆرتینگ کانساس سیتی دەبێتەوە.
یارییەکە کاژێر 03:30ـی بەرەبەیان لە رکابەرییەکانی گەڕی نۆیەمی خولەکەدا بەڕێوەدەچێت، یارییەکە لە یاریگەی ئارۆهێد لە کانساس بەڕێوەدەچێت، لە ماوەی تەنیا 15 خولەکدا سەرجەم بلیتەکانی ئەم یارییە بەهۆی یارییکردنی لیۆنێل مێسییەوە فرۆشراون و چاوەڕواندەکرێت 76 هەزار هاندەر لە یاریگەدا ئامادەبن.
ئینتەرمەیامی لەکاتێکدا ئەم یارییە ئەنجامدەدات، چەند رۆژێکی کەم لەمەوبەر لە جامی کۆنکافدا بە یانەی مۆنتێری مەکسیکی دۆڕا و ماڵئاوایی لە رکابەرییەکانی پاڵەوانێتییەکە کرد، مێسی و هاوڕێکانی لە مەیامی دەیانەوێت قەرەبووی کرانە دەرەوەکەیان بکەن.
بەر لە یارییەکە ئینتەرمەیامی لە بەشی رۆژهەڵاتی خولەکەدا لە پلەی سێیەمی ریزبەندە، کانساس سیتی لە بەشی رۆژئاوای خولەکە یاریی دەکات و لە پلەی حەوتەمی ریزبەندە.
ئینتەرمەیامی لە خولی ئەمریکادا تاوەکو ئێستا 8 یاریی ئەنجامداوە. 3 بردنەوە و 3 یەکسانبوونی هەیە و لە 2 یارییدا دۆڕاوە، لە بەشێکی یارییەکانی یانەکەدا بەهۆی پێکانەوە لیۆنێل مێسی ئامادەنەبووە، بەڵام بۆ یارییەکەی بەرەبەیانی رۆژی یەکشەممە ئامادەیە و چاوەڕواندەکرێت بەشێوەی سەرەکی یاری بکات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ