رووداو دیجیتاڵ
یانەی ریڤەرپلەیت دووەم بردنەوەی لەم وەرزەی خولی تۆپی پێی ئەرجەنتیندا تۆمارکرد و بە زەحمەت لە یانەی ئارخێنتینۆسی بردەوە.
لە رکابەرییەکانی گەڕی سێیەمی خولی ئەرجەنتین، یانەی ریڤەرپلەیت لە یاریگەی مۆنۆمێنتال بە ئامادەبوونی 83 هەزار هاندەر میوانداریی یانەی ئارخێنتینۆس جونیۆری کرد و یارییەکەی بە دوو گۆڵ بەرامبەر گۆڵێک بردەوە.
لە خولەکی 43 یانەی میوان گۆڵی پێشکەوتنی لە رێگەی فرانسیس ماک ئالیستەرەوە تۆمارکرد، کە برای ئالێکس ماک ئالیستەری یاریزانی یانەی برایتنی ئینگلیزییە و نیوەی یەکەم لە بەرژەوەندی یانەی میوان کۆتاییهات.
لە خولەکی 49 میگێل برۆخا، بەلێدانی سزا ئەنجامەکەی بۆ ریڤەرپلەیت یەکسانکردەوە و یارییەکەی گەڕاندەوە خاڵی سەرەتا.
لێدانێکی دیکەی سزا بۆ خاوەن یاریگە هەژمارکرا، لە خولەکی 70 ئیزیکوێل بارکۆ سەرکەوتووانە لێدانەکەی جێبەجێکرد و ریڤەرپلەیت دووەم بردنەوەی لەم وەرزەی خولەکەدا تۆمارکرد و سێ خاڵی دیکەی بەدەستهێنا.
بەبردنەوەی ئەم یارییە ریڤەرپلەیت بووە خاوەنی 6 خاڵ و لە پلەی چوارەمی ریزبەندە، ئارخێنتینۆ جونیۆر تەنیا 3 خاڵی هەیە و دووەم یارییە دەدۆڕێنێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ