رووداو دیجیتاڵ
دێنیز ئونداڤ، هێرشبەری کوردی هەڵبژاردەی ئەڵمانیا لە درەوشانەوە بەردەوامە و سەرکردایەتی بردنەوەیەکی گرنگی هەڵبژاردەکەی کرد.
ئەڵمانیا لە رکابەرییەکانی گەڕی سێیەمی نەیشنسلیگدا لە دەرەوەی یاریگەی خۆی بەرامبەر هەڵبژاردەی بۆسنە یارییکرد.
بۆ یاریی دووەم لەسەریەک دێنیز ئونداڤ، هێرشبەری کورد بەشێوەی سەرەکی یارییکرد و سەرکردایەتی هەڵبژاردەکەی کرد بۆ بردنەوە بە دوو گۆڵ بەرامبەر گۆڵێک.
لە خولەکی 30 ئونداڤ دەرگەی گۆڵکردنی کردەوە و هەڵبژاردەی ئەڵمانیای پێشخست.
دوای شەش خولەک لەو گۆڵە، ئەستێرە کوردەکە گۆڵی دووەمی خۆی و هەڵبژاردەی ئەڵمانیای تۆمارکرد، نیوەی یەکەمی یارییەکە بە پێشکەوتنی ئەڵمانیا تەواو بوو.
لە نیوەی دووەمدا، دێنیز گۆڵی سێیەمیشی تۆمارکرد، بەڵام بەبیانووی ئۆفسایدەوە رەتکرایەوە و دواتر یاریزانە کوردەکە لە خولەکی 61 گۆڕانکاریی پێکرا.
لە خولەکی 70 ئێدین دزیکۆ، گۆڵێکی بۆ هەڵبژاردەی بۆسنە تۆمارکرد و ئەنجامەکەی کەمکردەوە.
یارییەکە تاوەکو کۆتایی بەو ئەنجامە مایەوە، ئەڵمانیا بەسەرکردایەتی ئەستێرەیەکی کورد سێ خاڵی یارییەکەی بردەوە و لە پلەی یەکەمی کۆمەڵەی سێیەمی ئاستی یەکەم بووە خاوەنی 7 خاڵ، بۆسنە لە 3 گەڕدا تەنیا یەک خاڵی هەیە.
ئونداڤ چی کرد؟
* دێنیز ئونداڤ، دووەمجارە بەشێوەی سەرەکی بەشداری لە یارییەکانی ئەڵمانیادا دەکات لە رکابەرییەکانی نەیشنسلیگدا.
* دێنیز ئونداڤ، یەکەمجارە لە یارییەکەدا دوو گۆڵ بۆ هەڵبژاردەی ئەڵمانیا بکات.
* دێنیز ئونداڤ، لە دوایین دوو یارییدا بۆ هەڵبژاردەی ئەڵمانیا 3 گۆڵی تۆمارکردووە و دوو یارییە لەسەریەک گۆڵ دەکات.
* ئونداڤ لەم وەرزەدا لەسەر ئاستی یانە و هەڵبژاردە، 12 یاریی ئەنجامداوە، 9 گۆڵی تۆمارکردووە و 2 ئاسیستی هەیە، یاریزانەکە بەشداریی لە 11 گۆڵدا کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ