رووداو دیجیتاڵ
یانەی زاخۆ لە دوایین یاریی قۆناخی پلەی ئۆفدا لە قۆناخی پێشکۆتایی باسکەی عێراقدا، بە یانەی نەفت دۆڕا و دوای یارییەکەش گرژی دروستبوو و یانەی زاخۆ سزادرا.
لە یارییەکەدا زاخۆ تاوەکو دوایین ساتەکانی یارییەکە لە پێش بوو و نزیکبوو بگاتە یاریی کۆتایی، بەڵام لە دوا ساتدا یانەی نەفت خاڵێکی دووانیی تۆمارکرد و یارییەکەی بە 74 خاڵ بەرامبەر 72 خاڵ بردەوە.
دوای یارییەکە بەهۆی هەڵسوکەوتی دوو یاریزانی یانەی نەفت بەرامبەر هاندەران، گرژی و ئاڵۆزی لەنێو یاریگەدا دروستبوو و هاندەران کورسییان گرتە یاریزانەکان.
دوای یارییەکە راستەوخۆ، یەکێتیی باسکەی عێراق بڕیارییدا عەباس هادی و رافایێل سۆزا، یاریزانانی یانەی نەفت هەریەکەیان بە پێبژاردنی 1 ملیۆن دینار سزابدات، بەهۆی ئەو هەڵسوکەوتانەی دوای یارییەکە پێشانیاندا.
جگە لەمەش لە راگەیێنراوی یەکێتیی باسکەی عێراقدا هاتووە، بەهۆی شکاندنی پەژەکانی هۆڵی شەعب لەلایەن هاندەرانی یانەی زاخۆوە، یانەکە بەپێبژاردنی 3 ملیۆن دینار سزادرا.
فیدراسیۆنەکە زیاتر دەڵێت "شەوقی کازم، ئەندامی دەستەی کارگێریی یانەی نەفت بەهۆی ئەوەی لە دوای یارییەکە هێرشیکردووەتەوە سەر سەرۆکی یانەی زاخۆ، بۆ دوو یاریی داهاتووی تیپەکەی سڕکراوە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ