رووداو دیجیتال
یانەی شورتەی عێراقی کەمپێکی راهێنان لە شاری قاهیرەی پایتەختی میسر دەکاتەوە، وەک ئامادەکاری بۆ یارییەکانی خولی یانە پاڵەوانەکانی ئاسیا و خولی نایابی عێراق.
یانەی شورتە لە 1932 دامەزراوە، یانەیەکی ناسراوی شاری بەغدایە، ئێستا عەبدولغەنی شەهد راهێنەری ناسراوی عێراقی سەرکردایەتی یانەکە دەکات.
ماهر حەسان، بەرپرسی راگەیاندنی یانەی شورتە لە لێدوانێکی تایبەت بە تۆڕی میدیایی رووداو رایگەیاند "راهێنانی یانەکەمان چەند رۆژێکە لە شاری بەغدا بەپێی رێنماییە تەندروستییەکان دەستیپێکردووە، بەڵام لە رۆژی 20ی ئەم مانگە کەمپێکی راهێنان بۆ ماوەی دوو هەفتە لە شاری قاهیرە دەکەینەوە بۆ یاریزانانمان".
پێکهاتەی یانەی شورتە یەکێکە لە بەهێزترینەکانی عێراق، لەبەرئەوەی تیپەکە پڕە لە ئەستێرەکانی هەڵبژاردەی عێراق و یاریزانی پیشەگەر.
حەسان زیاتر گوتی "لەسەر داوای راهێنەرمان هێرشبەرێکی تونسی دەهێنینە ریزەکانمان، بۆ ئەوەی هێڵی هێرشبەرمان زۆر بەهێزبێت بۆ یارییەکانی خولی یانە پاڵەوانەکانی ئاسیا".
یانەی شورتە لە خولی یانە پاڵەوانەکانی ئاسیا، لە کۆمەڵەی یەکەم رکابەری یانەکانی ئیستیقلالی ئێرانی، وەحدەی ئیماراتی لەگەڵ ئەهلی سعودی دەکات، بڕیارە 14ی سێپتێمبەر یانەی شورتە رووبەڕووی یانەی ئەهلی سعودیە ببێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ