ئەنچێلۆتی هۆشداری دەداتە مانچێستەر سیتی

 

 

ئەنچێلۆتی لە دوای یەکسانبوونیان بەرامبەر مانچێستەر سیتی بە سێ گۆڵ بۆ هەرلایەک لەنێو یاریگەی سانتیاگۆ بێرنابیۆ، لە کۆنگرەی رۆژنامەڤانی دوای یارییەکە گوتی "دەمانتوانی یارییەکە ببەینەوە و هەلی ئەوەمان بۆ رێککەوت ئەنجامەکە بکەینە سێ گۆڵ بەرامبەر گۆڵێک، بەڵام هاوکات دەشکرا بدۆڕێین، کاتێک بە سێ گۆڵ بەرامبەر دوو گۆڵ لە دواوە بووین لە دوایین 20 خولەکی یارییەکەدا."

 

کارلۆ زیاتر گوتی "ئەگەر متمانەیەکی تەواومان بەخۆمان نەبووایە بۆ ئەوەی بەسەر بارودۆخەکەدا زاڵ بین ئەوا دەدۆڕاین، بۆیە پێموایە ئەنجامی یارییەکە راستە و رەنگدانەوەی ئاستی هەردوو تیپ بوو. بیرۆکەی یارییکردمان هەبوو، بۆ یاریی گەڕانەوەش بەهەمان شێوە دەبێت دەجەنگین و گوشار دەکەین، بزانین چی روودەدات."

 

راهێنەری ریال مەدرید لە بەشێکی دیکەی قسەکانیدا لەبارەی یاریی گەڕانەوە گوتی "چوامی لە یاریی گەڕانەوەدا یاریی ناکات، بەڵام ناچۆ و مێلیتاومان هەیە، ئەمە بیرۆکەی منە، پێویستە هەڵسەنگاندن بۆ ئەوە بکەین کە لە یارییەکە چی روویدا، بەڵام ئەمە بیرکردنەوەی منە و هاوشێوەی ساڵی رابردوو زیادەڕۆیی زۆر ناکەین."

 

ئەنچێلۆتی بە رۆژنامەڤانانی گوت "متمانەمان بەخۆمان هەیە و باوەڕمان وایە دەتوانین شتێکی باش بکەین، بەڵام بێگومان یارییەکی قورس دەبێت، هەرچەند یاریگەی مانچێستەر بەقەد یاریگەی ئێمە فراوانە و بەقەد یاریگەکەشمان درێژە، دۆخەکە وەکو یەکە، تەنیا ئەوە نەبێت کە ئێمە پاڵپشتیی هاندەرانمان لەگەڵ نابێت، بەڵام متمانەمان بەخۆمان هەیە."

 

یاریی چوونی نێوان هەردوو یانەی ریال مەدرید و مانچێسستەر سیتی لە سانتیاگۆ بێرنابیۆ بە 3-3 کۆتاییهات، یاریی گەڕانەوە رۆژی چوارشەممەی داهاتوو لە یاریگەی ئیتیحاد بەڕێوەدەچێت.