ڤیدیۆ؛ دوای یارییەکەی ریال مەدرید و مان سیتی چی روویدا؟

 

 

یارییەکە لە سانتیاگۆ بێرنابیۆ بەڕێوەچوو، مانچێستەر سیتی بە هێرشبردن و گوشارخستنە سەر گۆڵی ریال مەدرید دەستی بە یارییەکە کرد، بەڵام دوای لەدەستدانی چەند هەلێک، لە هەلێکدا ڤینیسیۆس جونیۆر دەرکەوت و لە دەرەوەی ناوچەی سزا بەلێدانێکی بەهێز تۆڕی یانە ئینگلیزییەکەی هەژاند، ریال مەدریدی بە گۆڵێک پێشخست و ژمارەی گۆڵەکانی خۆیشی لەم وەرزەدا، لەسەرجەم خول و پاڵەوانێتییەکاندا بۆ 23 گۆڵ بەرزکردەوە.

 

جگە لەوەش یاریزانەکە 11 یاریی لەسەریەکە لە چامپیۆنزلیگدا بەشداری لە گۆڵدا دەکات و ریکۆردی کریستیانۆ رۆناڵدۆی یەکسانکردەوە، بەو گۆڵەشی کە ئەمشەو تۆماریکرد بووە خاوەنی 15 گۆڵ لە چامپیۆنزلیگ و لەگەڵ رۆدریگۆ گوس و رۆناڵدۆ دێلیما یەکسانبووەوە.

 

نیوەی یەکەمی یارییەکە بە گۆڵێکی بێبەرامبەر لە بەرژەوەندی خاوەن یاریگە کۆتاییهات.

 

لە نیوەی دووەمدا مانچێستەر سیتی بە ئامانجی یەکسانکردنەوەی ئەنجامەکە و ریال مەدریدیش بۆ پاراستنی پێشکەوتنیان یارییدەکرد، بەڵام مان سیتی لە گەیشتن بە ئامانجەکەی سەرکەوتووتربوو و کیڤن دیبرۆین بەلێدانێکی بەهێز ئەنجامەکەی یەکسانکردەوە و یارییەکەی گەڕاندەوە خاڵی سەرەتا.

 

دیبرۆین بە تۆمارکردنی ئەم گۆڵە، بووە خاوەنی 14 گۆڵ لە چامیپۆنزلیگدا و لەگەڵ زینەدین زیدان، ئەستێرەی پێشووی فەرەنسا یەکسانبووەوە، جگە لەوەش یەکەم یاریزانی مانچێستەر سیتییە لە قۆناخەکانی کرانە دەرەوەی چامپیۆنزلیگدا 11 گۆڵی تۆمارکردبێت.

 

یارییەکە بەیەکسانبوون بە گۆڵێک بۆ هەرلایەک کۆتاییهات، کیڤن دیبرۆین بەباشترین یاریزانی یارییەکە دەستنیشانکرا، رۆژی 17ـی ئەم مانگە یاریی گەڕانەوەی نێوان هەردوو یانە لە یاریگەی ئیتیحاد لە مانچێستەر بەڕێوەدەچێت و ئەو یانەیەی دەگاتە یاریی کۆتایی چامپیۆنزلیگی ئەم وەرزە یەکلادەبێتەوە.