ریال مەدرید سوپرایزێکی گەورەتری پێیە

رووداو دیجیتاڵ

 

راپۆرتە رۆژنامەڤانییەکانی ئیسپانیا، پشتڕاستیان کردەوە کە ئێرلینگ هالاند، ئەستێرەی نەرویجی، و یانەی مانچێستەر سیتی، هێشتا خەونی خۆی بۆ گواستنەوەی بۆ ریزەکانی ریال مەدرید کۆتایی پێنەهێناوە. یانەی شاهانەش گرێبەستکردن لەگەڵ ئەو یاریزانە ئامانجیەتی.
 
بەگوێرەی رۆژنامەی ئەی ئێس، ئەو لێدوانەی هالاند کاتێک پرسیاری لەبارەی ریال مەدریدەوە لێکرا، و وەڵامەکەی ئەوەبوو کە نازانم لە داهاتوودا چی روودەدات، بووە هۆی بوومەلەرزەیەک لە ئینگلتەرا، بەتایبەتی کە وەک رۆژنامەکە باسی دەکات، هالاند دەیتوانی بڵێت "داهاتووی من لەگەڵ مانچێستەر سیتییە".
 
رۆژنامە ئیسپانییەکە ئاماژەی بەوە کردووە، ئەگەری بینینی هالاند لە مەدرید لە داهاتوودا، سەرەڕای نزیکبوونەوەی هاتنی کیلیان ئێمباپێ بۆ یانەکە بەدوور نابینرێت.
 
ئاماژەی بەوەشکردووە، ریال مەدرید بۆ ئەوەی گرێبەستەکە کۆتایی پێبهێنێت، پشت بە رافایلا پیمێنتای بەڕێوەبەری کارەکانی هالاند دەبەستێت، کە بڕگەیەکی لە گرێبەستەکەی لەگەڵ مانچێستەر سیتی داناوە کە رێگەی پێدەدات لە هاوینی 2024ـەوە دەستپێبکات، و بەهۆیەوە هەر یانەیەکی دەرەوەی ئینگلتەرا دەتوانێت بە دانی مەرجی سزایی گرێبەستەکەی هالاند هەڵبوەشێنێتەوە.
 
بەگوێرەی ئەو سەرچاوانە، ئەگەر هالاند وەڵامی گوشارەکانی سیتی بداتەوە و رازی بێت گرێبەستەکەی نوێبکاتەوە، پیمێنتا حەزدەکات بڕگەیەکی نوێ دابنێت کە لە رێگەیەوە مێرێنگێ بتوانێت بە بیقۆزێتەوە بۆ یەکلاییکردنەوەی گرێبەستەکە.
 
ئەی ئێس ئاشکراشیکردووە کە ریال مەدرید کێشەی بۆ دروست دەبێت لە رووی پێدانی مووچەی ئێرلینگ هالاند و کیلیان ئێمباپێ (ئەگەر گرێبەستەکە بۆ هێرشبەرە فەرەنسییەکە تەواوبێت)، بەڵام ئەمە راست نییە، چونکە بێرنابیۆ نوێیەکە سەرچاوەی ئابووری نوێ بۆ یانەی شاهانە دابین دەکات، کە دەکاتە 150 ملیۆن یۆرۆ، و لە وەرزی داهاتوو دەست پێدەکات.