رووداو دیجیتاڵ
کورد گوتەنی "ریال مەدرید دەیەوێت لە سعودیە بە بەردێک دوو چۆلەکە بکوژێت". ئەو یانەیە بەنیازە لەگەڵ خۆیدا جامی سوپەری ئیسپانیا و یاریزانێکی یانەی نەسڕ بباتەوە ئیسپانیا.
راپۆرتە رۆژنامەڤانییەکان ئاشکرایان کردووە کە ئەگەری هەیە یانەی ریال مەدرید سوود لە بوونی خۆی لە سعودیە وەربگرێت، کە بۆ بەشداریکردن لە یارییەکانی جامی سوپەری ئیسپانیا لەوێیە، بۆ ئەوەی هەنگاوێکی گرنگ لە بازاڕی گواستنەوەی زستانەدا بنێت.
ریال مەدرید ئەمشەو پێنجشەممە لە یاریگای جەوهەرە رووبەڕووی یانەی ریال مایۆرکا دەبێتەوە، لە قۆناخی پێش کۆتایی جامی سوپەری ئیسپانیا. براوەی یارییەکە لە یاریی کۆتاییدا رووبەڕووی بارسێلۆنا دەبێتەوە.
بارسێلۆنا توانی بلیتێکی یاریی کۆتایی بەدەستبێنێت دوای ئەوەی بە دوو گۆڵی بێبەرامبەر لە ئاتلێتیک بیلباوی بردەوە.
بەگوێرەی ماڵپەڕی onefootball یانەی شاهانە دەیەوێت ئێمریک لاپۆرتی بەرگریکاری ئیسپانیی یانەی نەسڕی سعودی رازی بکات لەم مێرکاتۆی زستانەدا بچێتە ریزەکانی، کە مێرینگێ بەهۆی زۆری پێکانەکان پێویستی بە یاریزانێکی دڵی بەرگرییە.
لاپۆرتی تەمەن 29 ساڵان، یاریزانی هەڵبژاردەی ئیسپانیا، بژاردەیەکی سەرنجڕاکێشە بۆ کارگێڕیی یانەی رریال مەدرید، بەتایبەتی دوای پێکانەکەی ئیدێر میلیتاوی بەرگریکاری بەرازیلی، کە یانەکە هەوڵی بەهێزکردنی هێڵی بەرگری خۆی دەدات، و بەرگریکاری پێشووی مانچێستەر سیتی بە چارەسەرێکی دەستبەجێ دەبینێت، بەتایبەتی کە کارلۆ ئەنچێلۆتی راهێنەر سەرسامە بە یاریزانەکە و رازییە بیخاتە پێکهاتەکەی.
لە راپۆرتەکەی ماڵپەڕی onefootball هاتوە، یانەی نەسڕ کە ئاگاداری گرنگیدانی یانەی ریال مەدریدە بۆ ئەو یاریزانەی، ئامادە دەبێت دانوستاندن لەسەر گواستنەوەی لاپۆرت بکات بەبڕی نزیکەی 15 ملیۆن یۆرۆ، کە بە بڕە پارەیەکی گونجاو دادەنرێت بۆ یاریزانێک کە کوالیتی و ئەزموونی هەبێت.
وەک ئەو سەرچاوەیە باسی دەکات، یەکێک لە ئاستەنگە سەرەکییەکانی بەردەم تەواوکردنی گرێبەستەکە، مووچەی بەرزی یاریزانەکەیە، چونکە ساڵانە نزیکەی 24 ملیۆن یۆرۆ لەگەڵ یانەی نەسڕ داهاتی هەیە.
ئاماژەی بەوەشکردووە، یاریزانەکە دەبێت کەمکردنەوەیەکی بەرچاوی مووچەکەی قبوڵ بکات بۆ ئەوەی بتوانێت جارێکی دیکە بگەڕێتەوە بۆ لالیگا.
لە کۆتایی راپۆرتەکەدا هاتووە "ئەگەری هەیە فلۆرێنتینۆ پێرێز، سەرۆکی ریال مەدرید، پەیوەندی و کۆبوونەوەکانی لەکاتی یارییەکانی جامی سوپەری ئیسپانیا لە سعودیە بقۆزێتەوە، بۆ ئەوەی لە بەرپرسانی یانەی نەسڕ و دەوروبەری لاپۆرتەوە نزیک بێتەوە. جگە لەوەش دەبێت یاریزانەکە ئامادەبێت بۆ ئەوەی بەشێک لە مووچەکەی بکاتە قوربانی، کە بەو شێوەیە دەتوانرێت دەرگای گرێبەستێک بکرێتەوە کە لەماوەیەکی کورتخایەندا بەرگری ریال مەدرید بەهێزتر دەکات".
هەندێک لە راپۆرتە رۆژنامەڤانییەکان لە ئیسپانیا پێشتر ئاماژەیان بەوە کردبوو کە یانەی ریال مەدرید دەیەوێت لە هاویندا گرێبەست لەگەڵ لاپۆرت بکات، بەو مەرجەی گرێبەستەکەی لەگەڵ یانەی نەسڕی سعودی هەڵبوەشێنێتەوە، بەڵام ئەوە رووی نەدا.
ئێمریک لاپۆرت، لە هاوینی 2023 لە یانەی مانچێستەر سیتییەوە پەیوەندی بە یانەی نەسڕەوە کردووە. ئەو 56 یاری بۆ یانەی نەسڕ ئەنجامداوە و 7 گۆڵی تۆمارکردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ