هەڵەیەک روویدا! دووبارە هەوڵبدە
رووداو – هەولێر
مەسعود ئۆزێل یاریزانی رەسەن كوردی یانەی ئارسیناڵ و هەڵبژاردەی ئەڵمانیا، بە باشترین یاریزانی 2013ی ئەڵمانیا دەستنیشانكرا و بۆ ساڵی سێیەم لەسەریەكە ئەو خەڵاتە دەباتەوە.
بەپێی راگەیاندراوی یەكێتیی تۆپی پێی ئەڵمانیا DFB، مەسعود ئۆزێل تەمەن 25 ساڵ، بە بەدەستهێنانی 30%ی دەنگی بەشداربووانی راپرسییەك، كە یەكێتییەكە سازیكردبوو، توانی پلەی یەكەم بەدەست بهێنێت و بە باشترین یاریزانی ساڵی 2013ی ئەڵمانیا هاتە دەستنیشانكردن.
ئەمەش ساڵی سێیەمی لەسەریەكە ئۆزێل ئەو نازناوە دەباتەوە و ئەمساڵ توانی بەپێش كاپتنی هەڵبژاردەی ئەڵمانیا فیلیپ لام بكەوێت، كە ئەویش 17.54ی دەنگەكانی بەدەستهێناوە و لە پلەی سێیەمیشدا تۆماس مۆلەری یاریزانی بایرن و هەڵبژاردەی مانشافت هاتووە بە رێژەی 13.68% دەنگەكان.
لەلای خۆیەوە مەسعود ئۆزێل لە لێدوانێكی بۆ ماڵپەڕی یەكێتیی تۆپی پێی ئەڵمانیا، سوپاس و پێزانینی خۆی بۆ عاشقانی تۆپی پێی ئەڵمانیا دەبڕی و
گوتی: ئێستاش لە هەر یارییەكی هەڵبژاردەی ئەڵمانیا بەشداریی دەكەم، هەست بە خۆشییەكی زۆر دەكەم و وادەزانم یەكەم یاریمە.
مەسعود ئۆزێل بەرەسەن كوردی باكووری كوردستانە، دەستپێكی وەرزشیی پیشەگەرانەی لە یانەی ڤێردەربرێمەنی ئەڵمانی بووە، پاشان روویكردە یانەی ریال مەدرید و ئێستا لە ئارسیناڵی لەندەنی یاریی دەكات، لە ئاستی نێودەوڵەتیشدا 52 یاری لەگەڵ مانشافتی ئەڵمانیا ئەنجامداوە و 17 گۆڵی تۆماركردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ