Photo by Pierre-Philippe MARCOU / AFP
رووداو دیجیتاڵ
یانەی ریال مەدرید، بە سەرکردایەتی جود بێلینگهام، سەرکەوتنێکی نوێی بەدەستهێنا و بە ئەنجامێکی گەورە لە ئۆساسونای بردەوە.
یانەی شاهانە لە گەڕی 9ـی لالیگادا، لەسەر یاریگەی سانتیاگۆ برنابیۆ، میوانداری ئۆساسونای کرد و 4-0 لێیبردەوە.
جود بێلینگهامی یاریزانی ئینگلیزی وەک هەمیشە درەوشایەوە و 9 خولەکی پێویست بوو بۆ ئەوەی گۆڵی پێشکەوتن بۆ ریال مەدرید تۆماربکات، کە نیوەی یەکەم بەم تاکە گۆڵەی ریال مەدرید کۆتاییهات.
لە نیوەی دووەمدا کوڕانی کارلۆ ئەنچێلۆتی باشتر دەرکەوتن و جارێکی دیکە بێلینگهام دوای 9 خولەک لە دەستپێکردنی نیوەی دووەم گۆڵی دووەمی خۆی و ریال مەدریدی تۆمارکرد.
لە خولەکی 65 ڤینیسیۆس جۆنیۆر گۆڵی سێیەمی شاهانەی تۆمارکرد، بەر لەوەی خۆسێلۆ دوای 5 خولەک گۆڵی چوارەمی ریال مەدرید تۆماربکات.
خۆسێلۆ دەرفەتی ئەوەی بۆ رەخسا ژمارەی گۆڵەکانی خۆی و یانەکەی زیاد بکات، بەڵام لێدانێکی سزای لەدەستدا و لە لایەن گۆڵپارێزی ئۆساسوناوە گەڕێندرایەوە.
بەم سەرکەوتنە، ریال مەدرید لە پێشەنگدا ژمارەی خاڵەکانی گەیاندە 24 خاڵ. لە کاتێکدا ئۆساسونا دەیەمە و دە خاڵی هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ