"مێسی بۆ هیلال"

 

 

بەرنامەی ئێل چێرینگیتۆی ئیسپانی لە پێشهاتێکی نوێدا دەڵێت "لیۆنێل مێسی رازییە لە خولی سعودیە یاریی بکات و پەیوەندی بە یانەی هیلالەوە بکات."

 

بەپێی ئەو سەرچاوەیە، هیلال نایەوێت بەتەنیا مێسی بباتە ریزەکانی بەڵکو سێرخیۆ بوسکێس، یاریزانی یانەی بارسێلۆناش دەگوازێتەوە، بۆ ئەوەی وەرزی داهاتوو بەیەکەوە لە یانەکە یاریی بکەن و هەوڵ بۆ گواستنەوەی خۆردی ئەلبای بەرگریکاری هەمان یانەش دەدات.

 

یانەی هیلال دوای دۆڕاندنی لە یاریی کۆتایی خولی یانە پاڵەوانەکانی ئاسیا، بۆ وەرزی داهاتوو دەیەوێت گۆڕانکاری گەورە لە تیپەکەیدا بکات و دەستبەرداری چەند یاریزانێکی دەبێت.

 

سەرەتای ئەم مانگە مێسی و ئانتۆنێلای هاوژینی بە گەشتێکی سێ رۆژە چوونە ریازی پایتەختی سعودیە، ئەم گەشتەی لیۆ کاردانەوەی گەورەی دروستکرد و چەند سەرچاوەیەک رایانگەیاند، یاریزانەکە لەگەڵ یانەی هیلال کۆبووەتەوە و گفتوگۆ لەبارەی گرێبەستی یانەکەوە کراوە.

 

رۆژنامەی مارکای ئیسپانی دەڵێت "دەستەوارەی یانەی هیلال بۆ لیۆنێل مێسی 400 ملیۆن یۆرۆیە و بۆ ماوەی دوو ساڵ دەبێت، لەگەڵ ئەوەی مامەڵەیەکی نایاب لە هەموو روویەکەوە لەگەڵ یاریزانەکە دەکرێت و دەستەوارەکە چەندین گۆڕانکاریشی تێدایە."

 

مێسی گرێبەستەکەی لەگەڵ پاریس سانجێرمان لە 30-6 کۆتاییدێت، بەئەگەری زۆرەوە یاریزانەکە لە یانە فەرەنسییەکە دەڕوات، بەتایبەت کە یاریزانەکە بەهۆی چوونی بۆ سعودیە لەلایەن یانەکەوە سزادراوە و لە ماوەی رابردووشدا هاندەرانی یانەکە چەندینجار فیکەیان لە دژی یاریزانەکە لێدا.