ڤیدیۆ؛ ئیسپانیا گەیشتە یاریی کۆتایی نەیشنسلیگ و مێژووی تۆمارکرد

 

 

یارییەکە لەسەر یاریگەی سانسیرۆ لە شاری میلانۆ بەڕێوەچوو، هەر لەسەرەتای یارییەکەوە هەردوو هەڵبژاردە بە هێرشکردن دەستیانپێکرد، بەڵام ئیسپانیا سەرکەوتووتر بوو، لە خولەکی 17 فێران تۆرێس دەرگای گۆڵکردنی کردەوە و تۆڕی جیانلویجی دۆناروومای هەژاند.

 

لە خولەکی 42 بەهۆی تووند یارییکردنەوە، لیۆناردۆ بۆنوچی، کاپتنی هەڵبژاردەی ئیتاڵیا بە کارتی سوور لە یارییەکە کرایە دەرەوە، ئەمەش رێگەی لە بەردەم ئیسپانیا کردەوە و هەڵبژاردەکە لەسەر گوشارخستنە سەر گۆڵی ئیتاڵیا بەردەوامبوو، لە دوایین خولەکی نیوەی یەکەمدا جارێکی دیکە ئۆیارزابال ئاسیستی کرد و فێران تۆرێس گۆڵی دووەمی خۆی و هەڵبژاردەی ئیسپانیای تۆمارکرد و نیوەی یەکەم بە دوو گۆڵی بێبەرامبەر کۆتاییهات.

 

لە نیوەی دووەمدا رۆبێرتۆ مانچینی لە پێناو گەڕانەوە بۆ نێو رکابەرییەکە و راستکردنەوەی ئەنجامەکە چەند گۆڕانکارییەکی کرد، لە خولەکی 83 لۆرێنزۆ پێلێگرینی گۆڵێکی بۆ پاڵەوانی ئەوروپا تۆمارکرد، بەڵام کاریگەرییەکی وای لەسەر ئەنجامەکە دروستنەکرد و ئیسپانیا بە دوو گۆڵ بەرامبەر گۆڵێک یارییەکەی بردەوە و گەیشتە یاریی کۆتایی پاڵەوانێتییەکە، ئیتاڵیای پاڵەوانی ئەوروپاش دوای 37 یاریی بەبێ دۆڕان تووشی یەکەم شکستبوو.

 

لە یاریی کۆتایی پاڵەوانێتییەکە ئیسپانیا بەرامبەر براوەی یاریی نێوان هەردوو هەڵبژاردەی فەرەنسا و بەلجیکا یارییدەکات، کە ئەمەش دووەم یاریی قۆناخی پێشکۆتایی نەیشنسلیگ دەکەن.

 

 

- ئیتاڵیا دوای 37 یاریی بەبێ دۆڕان 28 بردنەوە و 9 یەکسانبوون، تووشی یەکەم شکستبوو، درێژترین ریکۆردە لە مێژووی تۆپی پێدا هەڵبژاردەیەک تۆماریکردبێت، دوایین دۆڕانیان لە ساڵی 2018 بوو بەرامبەر فەرەنسا.

 

- ئیتاڵیا دوای 22 ساڵ یەکەمجارە لە نێو یاریگەی خۆیدا دەدۆڕێت.

 

- ئیسپانیا یەکەمجارە لەنێو یاریگەی ئیتاڵیادا بردنەوە تۆماربکات.

 

- ئیتاڵیا دووجار لەژێر سەرپەرشتی رۆبێرتۆ مانچینی خراپترین رێژەی کۆنتڕۆڵی تۆپی تۆمارکردووە، لە یاریی پێشکۆتایی یۆرۆی 2020 بەرامبەر ئیسپانیا 29.8٪ و لە یاریی پێشکۆتایی نەیشنسلیگ 25.2٪ هەر بەرامبەر ئیسپانیا.

 

- فێران تۆرێس لە دوایین 7 لێدانیدا بۆ گۆڵ لەگەڵ هەڵبژاردەی ئیسپانیا 6 گۆڵی تۆمارکردووە.

 

- ئیتاڵیا دووەمجارە لەژێر سەرپەرشتی مانچینی لە یارییەکدا زیاتر لە گۆڵێکی لێدەکرێت، پێشتر بەرامبەر فەرەنسا لە 2018، 3-1 دۆڕابوو.

 

- لیۆناردۆ بۆنوچی، دووەمجارە لە مێژووی یارییکردنیدا کارتی سوور وەردەگرێت، پێشتر لە 2014 بەرامبەر ماڵتا بۆ یەکەمجار وەریگرتبوو.

 

- یەکەمجارە دوای 37 یاری، جیانلویجی دۆنارووما لە یارییەکی ئیتاڵیادا زیاتر لە گۆڵێکی لێدەکرێت.

 

- لیۆناردۆ بۆنوچی 112 یاریی بۆ ئیتاڵیا ئەنجامداوە، ژمارەی دینۆ زۆڤی یەکسانکردەوە و حەوتەم یاریزانە زۆرترین یاریی بۆ هەڵبژاردەکە کردبێت.

 

- پابلۆ گاڤی، تەمەنی 17 ساڵ و 62 رۆژ بوو، بووە بچووکترین یاریزان یارییەکی نێودەوڵەتی بۆ ئیسپانیا بکات، بەمەش ریکۆردی ئانخێل زوبییتای شکاند کە لە 1936 لە تەمەنی 17 ساڵی و 284 رۆژیدا یاریی بۆ هەڵبژاردەکە کردبوو.