جامی جیهان لە 2017 ئەنجامدەدرێت
رووداو – هەولێر
تۆڕی هەواڵی ESPN ی وەرزشی بڵاویکردووەتەوە بڕیارە یەکەم پاڵەوانیەتی ئەفسانەکانی تۆپی پێ ئەوانەی کە وازیان لە یاریکردن هێناوە لە ساڵی 2017 لە مێکسیکۆ بەڕێوەبچێت و چەندین یاریزانی بەناوبانگی پێشووی تۆپی پێی جیهانیش بەشداری تێدا دەکەن.
چاوەڕواندەکرێت یارییەکانی پاڵەوانیەتییەکە لە شارەکانی مێکسیکۆ سیتی، گودالاخارا و مۆنتێری بەڕێوەبچن و 12 هەڵبژاردە بەشداری لە پاڵەوانیەتییەکە بکەن کە شەشیان لە ئەوروپا پێکهاتوون لە هۆڵەندا، ئەڵمانیا، ئیتاڵیا، ئیسپانیا، فرانسا و ئینگلتەرا و چوار هەڵبژاردەش لە ئەمریکا پێکهاتوون لە مێکسیکۆ، برازیل، ئارجێنتینا و ئەمریکا لەگەڵ هەردوو هەڵبژاردەی ئەفریقای باشوور و ژاپۆن لە کیشوەرەکانی ئەفریقا و ئاسیا.
سەرچاوەکە ئەوەشی ئاشکراکردووە لە پاڵەوانیەتییەکەدا هەریەکە لە زینەدین زیدانی 43 ساڵ و مایکل باڵاکی 39 ساڵ دەردەکەون و ئەو یاریزانانەی بەشداریش لە پاڵەوانیەتییەکە دەکەن دەبێت تەمەنیان لە نێوان 35 بۆ 45 ساڵ بێت.
کاتی یارییەکانی پاڵەوانیەتییەکەش جیاواز لە یارییە ئاساییەکان 60 خولەک دەبێت و هەر گێمێکی 30 خولەک دەبێت.