خامێس رۆدریگێز کۆڵۆمبیای گەیاندە قۆناخی پێشکۆتایی کۆپا ئەمریکا

 

لە قۆناخی چارەکی کۆتاییدا، کۆڵۆمبیا رووبەڕووی پەنەما بووەوە و بەئاسانی و بە ئەنجامێکی گەورە 5-0 لێیبردەوە و بلیتێکی چوارگۆشەی زێڕینی مسۆگەرکرد، کە لەوێ رووبەڕووی ئۆروگوای دەبێتەو و یارییەکە لە 11ـی ئەم مانگە لەسەر یاریگای بانکی ئەمریکا بەڕێوەدەچێت.

 

هەڵبژاردەی کۆڵۆمبیا دوای سەرنەکەوتنی بۆ مۆندیالی قەتەر، نێستۆر لۆرێنزۆی ئەرجەنتینی دەستنیشانکرد وەک راهێنەری نوێی هەڵبژاردەکە و لە کاتی دەستبەکاربوونییەوە تاوەکو ئێستا سەرپەرشتی 24 یاری هەڵبژاردەکەی کردووە و هیچ یارییەکی نەدۆڕاندووە. خاوەنی 18 سەرکەوتن و 6 یەکسانبوونە.

 

خامێس رۆدریگز، یاریزانی پێشووی یانەی ریال مەدرید، لەو یارییەدا درەوشایەوە و گۆڵێک و 2 ئەسیستی بۆ هەڵبژاردەکەی کرد، و بە باشترین یاریزانی یارییەکەش دیاری کرا.

 

خامێس هەرچەندە لەگەڵ یانەی ساوپاولۆی بەرازیلی خۆری بەرەو ئاوابوون دەچێت. بەڵام لەگەڵ هەڵبژاردەکەی رۆڵێکی کاریگەر دەبینێت و بەشداری کردووە لە 6 گۆڵی هەڵبژاردەکەی لە کۆپا ئەمریکادا.