نونۆ سانتۆ بۆ رووداو: تیپەکەمان تەنیا بنزیما نییە و یارییەکەمان بەرامبەر جەوییە زۆر قورس دەبێت

 

 

لە کۆنگرەیەکی رۆژنامەڤانیدا لەبارەی یارییەکەوە کە لە هەولێر ئەنجامدەدرێت، وەڵامی پرسیاری رووداوی لەبارەی بوونی بنزیما لە تیپەکەدا و رۆڵی یاریزانەکە بۆ هاوکاریکردنی یانەکە بۆ گەڕانەوە بۆ سەر سەرکەوتنەکان گوتی "هەموو یارییەک جیاوازە، لەبەرئەوەی رکابەرەکانمان دەگۆڕێن و هەریەکەیان تایبەتمەندی جیاوازیان هەیە. ئێمە خۆمان بۆ یارییەکە ئامادە دەکەین و تیپەکەمان تەنیا یەک یاریزان و یەک کەس نییە. هەموو ئەوانەی لەم هۆڵەدان ئەوە دەزانن کە تۆپی پێ واتە یەک تیپ و هەموو یاریزانەکان بەشدارن لە تیپەکەدا، هەر بۆیە بوونی تەنیا یەک یاریزان بەس نییە بۆ ئەوەی ئەنجامی یارییەک یەکلا بکەیتەوە."

 

سانتۆ لە وەڵامی رووداودا زیاتر گوتی "لەمەش هەمووی گرنگتر رۆحیەتی تیپەکە و کارکردنمانە وەک یەک تیم، هەمووانیش بەباشترین شێوە وزەی خۆیان بەخەرجدەدەن، ئەمەش ئەو شتەیە کە دەمانەوێت لە یارییەکەی ئەمجارەدا ئەنجامی بدەین."

 

راهێنەرە پۆرتوگالییەکەی یانەی ئیتیحاد زیاتر قسەی بۆ رۆژنامەڤانان کرد و دەڵێت "یانەی جەوییە یانەیەکی بەهێزن و بەرگرییەکی رێکخراوییان هەیە و لە هێرشی هەڵگەڕاوە زۆر مەترسیدارن، بەڵام ئەوان خاوەنی چوار خاڵن و ئەگەر بەراستی بیانەوێت سەربکەون دەبێت ئەم  یارییە ببەنەوە، بۆیە پێشبینی یارییەکی جیاواز دەکەم و ئەوان وەکو پێشتر تەنیا بەرگری ناکەن بەڵکو دێنە پێشەوە و بۆشایی بەجێدێڵن."

 

نونۆ سانتۆ لەبارەی خولی سعودیە و پڕۆژەی سعودییەکانەوە گوتی " خولی سعودی پرۆژەیەکی گەورەیە، نازانم دوای پێنج ساڵ چی روودەدات، زۆر شت هەیە پێویستە زیاتر پەرەی پێ بدرێت، وەك یانەکان و ئەکادیمیا و بەهرەدەۆزەرەوەکان، چونکە ئەوەی لە یاریگە دەیبینیت هەموو شتێك نییە و ئەوەی لە پشت پەردەشەوە روودەدات زۆر گرنگە."

 

لەبارەی ئەوەی پێکهاتەی یانەکەی جێگیر نییە، نونۆ دەڵێت "ئەگەر ئاگاداری بارودۆخی تیپەکەم بن هۆکارەکەی بەتەواوی دەزانن، ئێمە شەراحیلیمان لەدەستداوە، فابینۆ و کۆرنادۆ بەهەمان شێوە پێکانیان هەیە، بۆیەش پێکهاتەکەمان جێگیر نییە."

 

رۆژی دووشەممە کاژێر 15:00 بەکاتی باشووری کوردستان، لە رکابەرییەکانی چامپیۆنزلیگی ئاسیا، هەردوو یانەی قوە جەوییەی عێراقی و ئیتیحادی سعودی لە یاریگەی فرانسۆ هەریری لە هەولێر رووبەڕووی یەکدەبنەوە.