ئیمان خلیف
رووداو دیجیتاڵ
ئیمان خلیف، خانمە بۆکسێنەری جەزائیری، کە لە ئۆڵیمپیادی پاریسدا هەرای هێنایەوە، دوای ئەوەی بەوە تۆمەتبارکرا کە پیاوە، لە نوێترین هەڤپەیڤیندا، باسی رەوشی خۆی دەکات و پەیامێک بۆ جیهان دەنێرێت.
1- بۆچی دوای بردنەوەکەت لە قۆناخی چارکی کۆتایی گریای؟
ئیمان خلیف: نەمتوانی کۆنترۆلی خۆم بکەم، دوای ئەو هەرایەی راگەیاندن و دوای بردنەوەکە، کە لە یەککاتدا دڵخۆشیی هەبوو، لەگەڵ کاریگەرییەکی گەورەی دەروونی، چونکە پرسەکە پەیوەندی بە کەرامەتی مرۆڤەوە هەیە، ئەو شتە بوو کە دوای یارییەکە زۆر کاریگەری بەسەرمەوە هەبوو.
2- ئەگەر خانمە بۆکسێنەرە ئیتاڵییەکە لە یارییەکە نەکشابووایەوە ئەو هەموو هەرایە دروست دەبوو؟
ئیمان خلیف: بەڕاستی پێتانبڵێم، ئەو خانمە ئیتاڵییە چەند ساڵێکە دەمناسێت.. ساڵانێکە دەچمە ئیتاڵیا و لە شاری ئاسیسی لە هۆڵی ئاسیسی مەشق دەکەم. زۆربەی راهێنەرانی ئیتاڵیا دەمناسن کە هەر لە منداڵییەوە یاریم بۆ هەڵبژاردەکانی نیشتیمانی دەکرد. بەدیاریکراوی ئەو خانمە بۆکسێنەرە باش دەمناسێت و پێکەوە لە ئاسیسی مەشقمان کردووە، ئەوان ئەو هەڵمەتەی راگەیاندنیان قۆستەوە لەدژی من، بەڵام پشتیوان بەخوا ئێمە خۆمان بەدەستەوە نادەین.
3- بۆچی ئێستا ئەو هەموو تۆمەتانە درانە پاڵ تۆ، لەکاتێکدا ساڵانێکە بەشداری لە پاڵەوانێتییەکانی بۆکسێندا دەکەی؟
ئیمان خلیف: ئەوە ئەو پرسیارەیە کە منیش دەیکەم و دەڵێم بۆچی تاوەکو ئێستا ئەو پرسەیە نەورووژێنرا؟ ئەو بەلای منەوە گرنگ نییە، گرنگ ئەوەیە من هاتووم و سەرنجم لەسەر ئامانجەکەیە کە ئۆڵیمپیادە. من ئەمڕۆ لە نیوەی کۆتاییدام و پشتیوان بەخوا لە رۆژی خۆمدا دەبم. پشتیوان بەخوا، خوا یارمەتیم دەدات بۆ ئەوەی ئەم دوو قۆناخەش بەسەرکەوتوویی ببڕین.
4- کاتێک منداڵ بووی نانت لەسەر شەقامەکان دەفرۆشت بۆ ئەوەی کرێی مەشقەکانی بۆکسێن بدەی، ئێستا پێتوایە ئەو کارە پێویستی بەو هەموو ماندووبوونە بوو؟
ئیمان خلیف: چەندین ساڵ بوو راهێنەرەکەم قسەیەکی دەکرد و دەیگوت بەربەستەکان هاندان دروست دەکەن، واتا چەند بەربەست بێنە پێشت ئەوەندە هاندەرت دەبێت بۆ سەرکەوتن، من زۆر بڕوام بەم قسەیە هەبوو. ساڵانێک بەربەستم هاتوونەتە رێگە و ئەو بەربەستانە هاندانیان بۆ من دروست کردووە، پشتیوان بەخوا لە ئاستی خۆمدا دەبم و بە باسترین میدالیا دەردەچین.
5- پەیوەندی بە ماڵباتەکەتەوە دەکەی لە جەزائیر؟
ئیمان خلیف: من هەفتانە دووجار پەیوەندییان پێودەکەم. خۆزگە کاریگەر نەبن بەوەی بەسەرم هات، ئەوان نیگەرانن. پشتیوان بەخوا ئەو هەرایە بەبردنەوەی میدالیای زێڕ کۆتایی دێت و ئەوە باشترین وەڵام دەبێت.
6- پەیامێک بۆ ئەوانەی هەستی مرۆڤەکان بریندار دەکەن؟
ئیمان خلیف: من پەیامەکەم ئاراستە تەوای گەلانی جیهان دەکەم و پێیان دەڵێم پابەندبن بە بنەماکانی ئۆڵیمپیاد بەپێی جاڕنامەی ئۆڵیمپی و دوورکەونەوە لە سووکایەتیکردن و بریندارکردنی هەستی هەموو وەرزشوانان، چونکە ئەو کارە زۆر کاریگەری بەسەر وەرزشوانانەوە هەیە و دەتوانێت خەڵکی بڕووخێنێت و بیر و هزریان بکوژێت و نیوانی گەلان تێکدەدات.
8- پەیامێکی سوپاسگوزارانە بۆ لیژنەی ئۆڵیمپی نێودەوڵەتی تۆماس باخ؟
ئیمان خلیف: دەمەوێت سوپاسی تۆماس باخی سەرۆکی لیژنەی ئۆڵیمپی نێودەوڵەتی بکەم، کە بەخۆی پەیامێکی بۆ ناردم کە تێیدا هانی دام و پشتگیری خۆی بۆ دووپاتکردمەوە. زۆر سوپاسی لیژنەی ئۆڵیمپی نێودەوڵەتی دەکەم بۆ پشتگیرییەکەی و بۆ ئەوەی کە وشەی حەقی سەرخست. وەک ئێوە دەزانن من لە منداڵییەوە کچێکم ئامانج و خەونم هەیە. من لێرەم لە ئۆڵیمپیاد، لەپێناو خەونەکەم، پشتیوان بەخوا دەتوانم خەونەکەم بێنمە دی
7- پەیامێکی سوپاسگوزارانە بۆ جیهان؟
ئیمان خلیف: دەمەوێت سوپاسی هەموو ئەوانە بکەم کە پشتگیرییان کردووم، هەموو پیاو و خانمێکی جەزائیری و هەموو گەلی عەرەب و هەموو جیهان، کە پشتیوانم بوون لەم هێرشە ناڕەوایە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ