رووداو دیجیتاڵ
دوو یاریزانی یانەی شێروانە لە پاڵەوانێتیی لاوان بۆ یاریی "موای تای،" کە لە بەغدا بەڕێوەدەچێت، مێدالیای زێڕیان بەدەستهێنا و بوونە پاڵەوان. بەرپرسێک لە یانەکە داوا دەکات پشتگیریی یاریزانانی یارییەکان بکرێت.
عەبدولڕەحمان عوسمان، تەمەنی 13 ساڵە و لە کێشی 36 کیلۆگرامیدا توانی مێدالیای زێڕ بەدەستبهێنێت و ببێتە پاڵەوانی عێراق لە کێشەکەی خۆیدا؛ کچێکی 11 ساڵیش بەناوی بەهەشت دڵشاد، لە کێشی 30 کیلۆگرامیدا توانیی ببێتە پاڵەوانی عێراق و مێدالیای زێڕ بەدەستبهێنێت.
هەردوو یاریزانەکە دانیشتووی قەزای کەلارن لە ئیدارەی سەربەخۆی گەرمیان و یاریزانی یانەی وەرزشیی شێروانەن.
هەردی جەلال، بەرپرسی راگەیاندنی یانەکە ئەمڕۆ هەینی بە تۆڕی میدیایی رووداوی گوت، "یانەکەمان جگە لە تۆپی پێ، لە خوول و پاڵەوانێتییەکانی یارییەکانی موای تای، باسکە و بالە بەشداری دەکات، بەڵام جگە لە تۆپی پێ، هیچ هاوکارییەکی یانەکە و یاریزانانی یارییەکانی دیکە ناکرێت."
هەردی جەلال داوای لە حکومەتی هەرێمی کوردستان کرد، بایەخ بە هەموو یارییەکانی دیکە بدات و پشتیوانیی یاریزانەکان بکات، بۆئەوەی ناسناوی زیاتر بۆ کوردستان بەدەستبهێنن.
یاریی "موای تای،" جۆرێکە لە یاریی بۆکسێن، بەڵام یاریزانان لەم یارییەدا دەتوانن هەشت پەل بەکاربهێنن، لەوانە، دەست و پێ، ئەژنۆ و ئەنیشک.
پاڵەوانێتیی "موای تای،" کە لە بەغدا بەڕێوەدەچێت، دوێنێ دەستیپێکردووە و 48 یانەی عێراق بە زیاتر لە 450 یاریزانەوە تێیدا بەشدارن و بڕیارە چەند رۆژێک بخایێنێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ