کێ ناپۆلی رادەگرێت؟
رووداو دیجیتاڵ
یانەی ناپۆلی لەسەر ئەنجامە باشەکانی لە خولی ئیتاڵیادا بەردەوامە و بردنەوەی پێنجەمی لەسەریەک لە خولەکەدا تۆمارکرد و شوێنی خۆی لە پێشەنگی ریزبەندی خولەکەدا بەهێزترکرد.
ناپۆلی لە رکابەرییەکاین گەڕی 21ـی خولەکەدا لە دەرەوەی یاریگەی خۆی رووبەڕووی یانەی سپێزیا بووەوە و یارییەکەی بە سێ گۆڵی بێبەرامبەر بردەوە.
لە خولەکی 47 خڤیچا کڤارتسخێلیا بەلێدانی سزا گۆڵی پێشکەوتنی بۆ ناپۆلی تۆمارکرد و یانەکەی پێشخست، پاشان ڤیکتۆر ئۆسیمێن، ئەستێرە و گۆڵکاری یانەکە دوو گۆڵی لە خولەکەکانی 68 و 73 تۆمارکرد و ناپۆلی یارییەکەی بە سێ گۆڵی بێبەرامبەر بردەوە.
بەم بردنەوەیە یانەکەی باشووری ئیتاڵیا ژمارەی خاڵەکانی بۆ 56 خاڵ بەرزکردەوە و هەنگاوێکی دیکە لە بردنەوەی نازناوی ئەم وەرزەی خولی ئیتاڵیا نزیکبووەوە.
ڤیکتۆر ئۆسیمێن، هێرشبەری یانەکەش بە تۆمارکردنی 16 گۆڵ پێشەنگی گۆڵکارانی خولی ئیتاڵیایە و خڤیچا کڤارتسخێلیا 11 ئاسیستی کردووە کە زۆرترینە لەم وەرزەی خولەکەدا.