لە ریال مەدریدەوە و بۆ ئێمباپێ

 

 

رۆژنامەی لێکیپی فەرەنسی دەڵێت "یانەی ریال مەدرید وادەی کۆتایی دەخاتە بەردەم یاریزانەکە بۆ ئەوەی بەتەواوی خۆی یەکلابکاتەوە، ئەو وادەیەش تاوەکو ناوەڕاستی ئەم مانگە دەبێت."

 

بەپێی رۆژنامەکە، ئێمباپێ پێویستە هەرچی زووە خۆی یەکلابکاتەوە، یاریزانەکە بیر لەوە دەکاتەوە بەر لە دەستپێکردنی یارییەکانی قۆناخی 16ـی خولی یانە پاڵەوانەکانی ئەوروپا بڕیاری یەکلاکەرەوە لەبارەی داهاتووی خۆیەوە بدات.

 

لێکیپ زیاتر نووسیوویەتی "پاریس سانجێرمان کاردەکات بۆ ئەوەی بە زووترین کات پرسی ئێمباپێ تەواوبکات، لە هاوینی رابردووەوە پاریس سانجێرمان دەستبەرداری بیرۆکەی هێشتنەوەی یاریزانەکە نەبووە و هێشتا پلانی خۆی بەبێ ئەو یاریزانە دانەڕشتووە."

 

فابریزیۆ رۆمانۆ، لەبارەی کیلیان ئێمباپێوە نووسیوویەتی "ئێمباپێ هاوینی رابردوو لەگەڵ پاریس سانجێرمان رێککەوتووە، ئەگەر بێبەرامبەر لە یانەکە بڕوات لە پاداشتەکانی خۆشدەبێت کە لەنێوان 70 بۆ 80 ملیۆن یۆرۆیە."

 

کیلیان ئێمباپێ شەوی چوارشەممەی رابردوو لە جامی سوپەری فەرەنسادا گۆڵێکی تۆمارکرد و هاوکاریی یانەکەی کرد بۆ بردنەوەی نازناوی پاڵەوانێتییەکە، دوای ئەوەش گوتی "هێشتا هیچ بڕیارێکم نەداوە، لە پاریس هەموو بیرکردنەوەکان لای یانەکەن و ئەوەی باس ناکرێت دۆخی منە."

 

ریال مەدرید ماوەیەکی زۆرە چاوەڕیی گواستنەوەی یاریزانەکە دەکات، گرێبەستی کیلیان لە هاوینی ئەمساڵ کۆتاییدێت و دەتوانێت بێبەرامبەر لە یانە فەرەنسییەکە بڕوات.