لوكا مۆدریچ: بالۆن دۆر له ژووری خه‌وتنم داده‌نێم
رووداو – هه‌ولێر
لوكا مۆدریچ ئه‌ستێره‌ی ریال مه‌درید و براوه‌ی خه‌ڵاتی بالۆن دۆر، رایگه‌یاند، خه‌ڵاته‌كه چه‌ند شه‌وێك له ژووری نووستن و له نزیك سه‌رینه‌كه‌ی داده‌نێت، دواتر له شوێنێكی گونجاوی داده‌نێت.
گۆڤاری فرانس فوتبۆڵ دوای به‌خشینی خه‌ڵاتی تۆپی زێڕینی ئه‌مساڵ به لوكا مۆدریچی كرواتی، هه‌ڤپه‌یڤینێكی له‌گه‌ڵ ئه‌و یاریزانه كردووه و لێی پرسیوه، خه‌ڵاته‌كه له ماڵه‌وه له كوێ داده‌نێت، له وه‌ڵامدا ده‌ڵێت: "له چه‌ند شه‌وێكی سه‌ره‌تادا ره‌نگه له نزیك سه‌رینه‌كه‌م دایبنێم، دواتر شوێنێكی جوان و گونجاوی بۆ ده‌دۆزمه‌وه".
مۆدریچ ده‌ڵێت: ئه‌گه‌ر له نێوان بالۆن دۆر و جامی جیهانیدا سه‌رپشكم بكه‌ن، بێگومان جامی جیهانی هه‌ڵده‌بژێرم، چونكه خه‌ڵاته به‌كۆمه‌ڵه‌كان زۆر گرنگترن و هه‌مووكات ئه‌وان هه‌ڵده‌بژێرم، به‌ڵام له به‌دبه‌ختیدا ناتوانم بگه‌ڕێمه‌وه داوه و مۆندیال ببه‌مه‌وه، له‌گه‌ڵ ئه‌وه‌شدا تۆپی زێڕین خه‌ڵاتێكی گه‌وره‌یه بۆ من".
مۆدریچ باسی دوو یاریزانی كردووه و ده‌ڵێت: "گریزمان و ئیمباپێ دوو یاریزانی نایابن، ئه‌وان وه‌رزێكی گه‌وره‌یان هه‌بوو به بردنه‌وه‌ی نازناوی مۆندیال، دڵنیاشم ئه‌وان له داهاتوودا به ئاستێكی به‌رزتر ده‌رده‌كه‌ون، به تایبه‌تی ئیمباپێ، كه به‌هره‌یه‌كی گه‌وره‌ی هه‌یه و داهاتوویه‌كی پڕشنگدار چاوه‌ڕێی ده‌كات".
ئه‌ستێره‌كه‌ی ریال مه‌درید له هه‌ڤپه‌یڤینه‌كه‌ی فرانس فوتبۆڵدا هه‌روه‌ها گوتی: "بردنه‌وه‌ی بالۆن دۆر وه‌كو تۆڵه‌سه‌ندنه‌وه‌یه‌ك نییه به‌رامبه‌ر به‌ده‌ستنه‌هێنانی نازناوی مۆندیال، كاره‌كه به‌مشێوه‌یه نییه، من دڵخۆشم خه‌ڵك دانیان به ئاستبه‌رزیی مندا ناوه، ئه‌وان له‌م وه‌رزه‌دا شه‌ره‌فێكی گه‌وره‌یان به من به‌خشی".