ڤیدیۆ؛ ئارسیناڵ بە زۆرترین گۆڕانکارییەوە بۆ وەرزی نوێ ئامادەیە

 

 

گانەرز ئامادەکارییەکانی بۆ وەرزی نوێ تەواوکرد، بۆ یەکەم یاریی وەرز بەرامبەر کریستال پاڵاس بە گۆڕانکاریی گەورەوە ئامادەیە، هەریەکە لە ماتیۆ گوێندۆزی، کونستانتینۆس ماڤرۆپانس، ئەلیکساندەر لاکازێت و نونو تاڤارێس ریزەکانی یانەکەیان جێهێشتووە، لە بەرامبەر یانە لەندەنییەکە گرێبەستی لەگەڵ هەریەکە لە گابریێل خیسوس، فابیۆ ڤیێرا، ئۆلیکساندەر زینچینکۆ، مات تورنەر و مارکینیۆس واژۆکردووە.

 

ئارسیناڵ وەرزی رابردوو لە دوایین گەڕەکانی پرێمەرلیگدا ئاستی بەشێوەیەکی بەرچاو دابەزی و بەو هۆیەوە بلیتی چامپیۆنزلیگی لە بەرژەوەندی تۆتێنهام لەدەستدا.

 

یانە لەندەنییەکە بۆ رێکخستنەوە بەخشینی خوێنی نوێ بە تیپەکە نزیکەی 120 ملیۆن پاوەندی لە گواستنەوەی یاریزاناندا خەرجکردووە، دەیەوێت جارێکی دیکە بگەڕێتەوە نێو رکابەریی یانە گەورەکان، ئەگەر رکابەریکردن بۆ بردنەوەی پرێمەرلیگیش نەبێت بگاتەوە چامپیۆنزلیگ، کە لە 2017ـەوە بەشداریی لە پاڵەوانێتییەکەدا نەکردووە، لەکاتێکدا پێش ئەو ساڵە 19 جار لەسەریەک گەیشتبووە پاڵەوانێتییە گەورەکەی یانەکانی ئەوروپا.

 

لەو کاتەوەی میکێل ئارتێتا لە مانگی 12ـی 2019 بووەتە راهێنەری ئارسیناڵ، یانەکە نازناوێکی جامی یەکێتیی ئینگلتەرای بردووەتەوە، بەڵام هەر لە سەردەمی ئەویشدا ئارسیناڵ لە دوای 1995ـەوە خراپترین پلەی لە پرێمەرلیگدا بەدەستهێنا و هەردوو وەرزی 2019-2020 و 2020-2021 یانەکە لە پلەی هەشتەم وەرزەکەی تەواوکرد.

 

ئەوەی بۆ هاندەرانی یانە سوور و سپییەکە جێگەی دڵخۆشییە، ئەو ئاستە باشەی کە ئارسیناڵ لە یارییە دۆستانەکاندا پێشانیدا لە 5 یارییدا هەموو یارییەکانی بردەوە، جگە لەوەش لە یارییە دۆستانەکاندا گابریێل خیسوسی یاریزانی نوێی یانەکە لە 5 یارییدا 7 گۆڵی تۆمارکرد، ئەمەش هیوایەکی زۆری دایە هاندەرانی یانەکە بۆ ئەوەی لە وەرزی نوێدا خەونی ئەوان بۆ گەیشتنەوە بە چامپیۆنزلیگ و گەڕانەوە بۆ نێو رکابەرییەکان بکاتە راستی.