ئەمشەو چامپیۆنزلیگە.. رۆناڵدۆ و نەسڕ ئەرکیان قورسە

 

یارییەکە کاژێر 19:00 بەکاتی باشووری کوردستان، لەسەر یاریگەی هەزاع بن زاید، هەردوو یانە رووبەڕووی یەکدەبنەوە.

 

یانەی عەین بەسەرکردایەتیی هێرنان کریسپۆی ئەرجەنتینی ئاستێکی بەرز پێشکێشدەکات و لە شەش یاریی رابردوودا لەسەرجەم خول و پاڵەوانێتییەکاندا هیچ یارییەکی نەدۆڕاندووە و دەیەوێت سوود لە یاریگە و هاندەرانی وەربگرێت بۆ ئەوەی درێژە بە ئەنجامە باشەکانی بدات.

 

یانەی نەسڕ بە سەرکردایەتیی کریستیانۆ رۆناڵدۆ دەیەوێت لە رکابەریکردن بەردەوامبێت و بە ئەنجامێکی باشەوە بگەڕێتەوە سعودیە، بۆ ئەوەی لە قۆناخی داهاتوو نزیکببێتەوە.

 

نەسڕ لە دوایین سێ یارییدا لە قۆناخەکانی کرانە دەرەوەدا بەرامبەر یانەکانی ئیمارات هیچ یارییەکی نەدۆڕاندووە و دەیەوێت درێژە بەو مێژووە باشەی بدات، کە پێشتر هیچ یانەیەکی سعودی ئەمەی نەکردووە.

 

لە یارییەکەی ئەمشەوی نێوان هەردوو یانەدا، چاوەکان لەسەر کریستیانۆ رۆناڵدۆ و کودجۆ لابا دەبن، کە هەردووکیان گۆڵکاری تیپەکەیانن، رۆناڵدۆ لە چامپیۆنزلیگدا 5 گۆڵی کردووە و لاباش خاوەنی 6 گۆڵە.

نەسڕ لە دوایین یارییدا لە خولی سعودی بە چوار گۆڵ بۆ هەرلایەک کۆتاییهات و کریستیانۆ رۆناڵدۆ یاریی نەکرد، ئەمشەو یانە زەردپۆشەکە دەیەوێت قەرەبووی ئەو یەکسانبوونە بکاتەوە و بگەڕێتەوە سەر بردنەوەکان.