رووداو - هەولێر
وەرزێکی نوێی تۆپی پێی ئەڵمانیا و چوونە نێو رکابەری وەرزێکی دوور و درێژ دەستپێکەکەی دێر کلاسیکێر دەبێت، لەنێوان هەردوو گەورەکەی ئەو وڵاتە، بایرن میونشن و بۆرووسیا دۆرتموند.
ئەمشەو کاژێر 21:30 یاریگەی سیگناڵ ئیدونا پارک، بەرەنگی زەرد و رەشی دۆرتموندەوە باوەش بۆ رکابەرییکردنی باڤارییەکان دەکاتەوە، بۆ رکابەرییکردن لەسەر نازناوی جامی سوپەری ئەڵمانیا، کاتێک بایرنی پاڵەوانی خول و جامی وڵاتەکە لە وەرزی رابردوودا و دۆرتموندی دووەمی خولەکە بەرامبەر یەکدی یارییدەکەن.
دۆرتموند 5 ساڵە لە بردنەوەی نازناوەکە دوورە و ئەمشەو لە یاریگەی خۆیدا دەیەوێت بردنەوەی ئەم نازناوە بکاتە دەستپێکی رکابەرییەکان و بگەڕێتەوە سەر سەکۆی نازناوەکە، لەبەرامبەر بایرن میونشن پاڵەوانی سێ وەرزی رابردووە و ئامانجیشی بەرگریکردنە لەو باڵادەستیەی، بەتایبەت کە لە دوای ساڵی 2015ـەوە هیچ یانەیەک جگە لە بایرن نەیتووانیووە ئەو نازناوە بباتەوە.
بایرن میونشن و بۆرووسیا دۆرتموند لە گواستنەوەی ئەم هاوینەدا گۆڕانکاریی زۆریانکردووە و دەیانەوێت ئەمشەو توانای ئەستێرە نوێیەکانیان لە یاریگەدا بەیەکدی پێشانبدەن، بەتایبەت دۆرتموند دوای گرێبەستکردن لەگەڵ تورگان هازارد، جولیان براندت، ماتس هەمڵس و نیکۆ شوڵز، دەیەوێت ئەم یارییە بکاتە دەستپێکی کۆتاییهێنان بەباڵادەستی بایرن، بەڵام بەشدارییکردنی تورگان هازارد لە یارییەکەدا بەهۆی پێکانەوە جێگەی گومانە.
لەبەرامبەردا بایرن میونشیش گۆڕانکاریی زۆری کردووە، بێنیامین پاڤارد و لوکاس هێرناندێز دوو ئەستێرەی دیارن کە یانەکە گرێبەستی لەگەڵ کردوون، بەڵام هێرناندێز لەگەڵ سێرج نابری و خاڤی مارتینێز بەهۆکاری جیاوازە لە یارییەکەدا یاوەری پێکهاتەی نیکۆ کۆڤاچ ناکەن.
بایرن میونشن و بۆرووسیا دۆرتموند، مێژووییەکی دوور درێژیان لە رکابەرییکردنی یەکدی هەیە، کامیان سەرەتای کاروانی وەرزێکی دوور و درێژ بەبردنەوەی جامی سوپەری ئەڵمانیا دەستپێدەکات، باڤارییەکان گەورەیی خۆیان دووپاتدەکەنەوە، یان بۆرووسیا لە یاریگەی خۆیدا کۆتایی بەو باڵادەستییەی دەهێنێت، سیگناڵ ئیدونا پارک ئەو وەڵامەی پێیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ