دوو دەمژمێر ل گەل جەنەراڵێ دهۆکێ

 

 

 

د وێ گفتوگۆیێدا ئەز تێگەهشتم مەسعود میرال هاتییە، دهۆکەکا نوو ئاڤا بکەت کو ل هەمی عێراقێ دەنگڤەدەت و د دەمەکێ گەلەکێ کورتدا شیا ڤێ چەندێ بکەت.

 

جوداهیا جەنەڕاڵێ دهۆکیان لگەل هەر راهێنەرەکێ دیکە ئەوە، ئەو ب دوویڤ شێوازێ کەسێ ناکەڤیت و ژ بەرەڤانیێ حەزناکەت، ئەو بەردەوام حەزدکەت هێرشبەرانە یاریێ بکەت و تیما بەرامبەر نەچار دکەت بەرەڤانیێ بکەت، ناڤێ یاریزانی نابێژم لێ د یارییەکێدا دەما دهۆک ب گۆڵەکێ ل پێش دبیت یاریزانەک دبێژیتە مەسعودی کۆچ بلا ڤەگەڕینە بەرەڤانیێ، مەسعود دبێژیت هەرە ناڤا یاریگەهێ و ئەو نە کارێ تەیە، د وێ یاریێدا دهۆک سەرکەفت و دیرۆک تۆمارکر.

 

مەسعود راهێنەرەکێ تاکتیکی یێ سەردەمیانەیە، ل گەلەک جهـ و وڵاتان کارکرییە و د تۆپا پێیا نوودا تێدگەهیت، ئەو دزانیت بەرەڤانیکرن دێ گڤاشا ل سەر تیما وی زێدەکەت و د دیتنا ویدە هێرشبرن باشترین بەرەڤانیکرنە.

 

بچیکیا تەمەنێ وی راهێنەرێ کورد و نزیکیا وی لگەل یاریزان و کارگێرییا یانەیا دهۆک بوویە خاڵەکا گرنگ بۆ ئەوەی دهۆک وەکی خێزانەکێ کاربکەت و هەمی بهێنە سەر وێ بۆچوونێ یا میرال دبێژیت، ئازادیا کارگێڕیا یانەیێژی دایە وی ئەو کرییە یەک ژ باشترین راهێنەران ل سەر ئاستێ عێراقێ.

 

ئەڤا مەسعود دکەت، بەرهەمێ دەمەکێ گەلەک کێم یێ کارکرنێیە و ئەو ب باوەرییەکا مەزنڤە هاتییە و دخازیت دیرۆکێ ل دهۆکێ ب ناڤێ خۆ بکەت.

 

خاڵەکا دیکە یا گرنگ ل دەڤ مەسعود میرالی ئەوە، ب کێم تەماشەی کەسێ ناکەت، لێ ژ کەسێ ناترسیت و بەردەوام دبێژیت، بۆ من گرنگ نینە بەرامبەری من کییە، لێ گرنگ ئەوە ئەز دزانم ئەز دهۆکم.