رووداو دیجیتاڵ
پێپ گواردیۆلا، بەڕێوەبەری هونەریی یانەی مانچێستەر سیتی ئینگلیزی باسی قورسیی یارییەکەیان بەرامبەر ولڤەرهامتۆن دەکات و دەڵێت: " دەبێت ئەم یارییە بۆ ئێمە ببێتە وانەیەکی باش".
گواردیۆلا لە دوای بردنەوەیان لە ولڤەرهامتۆن بە 4-1 و تۆمارکردنی بردنەوەی ژمارە 21 لەسەریەک لە سەرجەم پاڵەوانێتییەکاندا گوتی: " بردنەوەیەکی شایستەبوو، یارییەکی جوان بوو، نیگەرانبووین کە لە یەکەم لێدانیاندا گۆڵیان لێکردین، یارییەکە زۆر قورس بوو، بەڵام ئێمە زۆر باشبووین و زۆربەباشی یارییمانکرد".
پێپ زیاتر گوتی: " دوای ئەوەی گۆڵی یەکسانبوونمان لێکرا، 5 خولەک کەوتینەوە کێشەوە، بەڵام سەرکەوتووبووین لەوەی ئارام و لەسەرەخۆ بین، لە کۆتاییدا زۆر هەلمان دروستکرد و بەدڵنیاییەوە سەرکەوتنێکی شایستەبوو، تەنیا دوو تۆپمان لەدەستدا و بەشێوەیەکی خێرا گەڕاینەوە".
راهێنەری یانەی مانچێستەر سیتی دەڵێت: " پێویستە وانەیەکی باش لەم یارییە وەربگرین بۆ قۆناخەکانی کرانە دەرەوە، لە قۆناخەکانی کرانە دەرەوە پێویستە بەردەوامبین و سڵ لە هیچ شتێک نەکەینەوە".
لەبارەی 21 بردنەوەیان لەسەریەک گواردیۆلا گوتی: " ئێستا مانچێستەر یونایتد لە هەموو شتێک گرنگترە ( یاریی داهاتووی مان سیتی بەرامبەر ئەو یانەیەیە)، پاڵەوانی ئێستا لیڤەرپوولە و تاجەکە لەسەر سەری ئەوە، ئێمە لە بارودۆخێکی زۆرباشداین بۆ ئەوەی نازناوەکەیان لێ وەربگرین و هەوڵ بۆ ئەوە دەدەین، بەڵام ئەوان پاڵەوانن".
گواردیۆلا ستایشی ئاستی بەرزی ریاز مەحرزی کرد و رایگەیاند، ئەو یاریزانە توانایەکی تایبەتی هەیە، لەنێو یاریگەدا سەما دەکات، تۆپ لەدەست نادات و بە تواناکانی جۆڵە بە یاریزانانی بەرامبەر دەکات و رووبەڕێکی زیاتر لە یاریگەدا دروستدەکات.
راهێنەری پێشووی بارسێلۆنا و بایرن میونشن ستایشی ئاستی گابریێل خیسوسیشی کرد و لە وەڵامی پرسیارێکدا گوتی: " ئێوە نازانن کە ئێمە چەند دڵخۆشین بە هەبوونی ئەو و ناتوانین پێشبینی بکەین کە ئەو چی بۆ یانەکە دەکات".
لە کۆتایی قسەکانیدا پێپ گواردیۆلا گوتی: " هێشتا 33 خاڵ ماون رکابەرییان لەسەربکەین، رۆژێک یان دوو رۆژ پشوومان هەیە بۆ ئەوەی خۆمان بۆ بەرامبەر مانچێستەر یونایتد ئامادەبکەین کە لەسەر یاریگەی خۆمان یارییدەکەین".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ