ڤیدیۆ؛ ئەهلی یاریی لووتکەی ریازی لە ئیتیحاد بردەوە
رووداو دیجیتاڵ
لە یاریی لووتکەی شاری جددە، لە گەڕی بیست و شەشەمی خولی رۆشنی سعودیەدا، یانەی ئەهلی بە گۆڵێکی بێبەرامبەر لە یانەی ئیتیحادی بردەوە.
یانەی ئیتیحاد لە سەرەتاوە دەستی بە هێرشبردن کرد و رۆمارینیۆی هێرشبەری نزیکبوو لە خولەکی بیست و دوودا گۆڵێک تۆماربکات، دوای ئەوەی پاسێکی لە کەریم بنزیماوە پێگەیشت.
یانەی ئەهلیش دەستی بە هێرشەکانی کرد و لە خولەکی سی و چواردا رۆبێرتۆ فێرمینۆ تۆپەکەی بۆ فیراس بریکان نارد و ئەویش بەدانایی تۆپەکەی خستە نێو تۆڕی گۆڵی ئیتیحاد و گۆڵی یەکەمی بۆ خانەخوێ تۆمارکرد.
گێمی دووەمی یارییەکە شایەتی درەوشانەوەی گۆڵپارێزی یانەی ئەهلی، ئیدوارد مێندی بوو، چونکە لە خولەکی پەنجا و دوودا لێدانێکی حەسەن کادێشی گەڕاندەوە. هەروەها لە خولەکی شەست و نۆدا لێدانێکی دیکەی کەریم بنزیمای گەڕاندەوە.
ئەستێرەی یانەی ئیتیحاد، نگۆلۆ کانتێ، لە خولەکی حەفتا و دوودا مووشەکێکی ئاراستەی گۆڵی ئەهلی کرد، بەڵام تۆپەکەی بەر ستوونی گۆڵ کەوت.
رۆبێرتۆ فیرمینۆ لە خولەکی هەشتا و دوودا گۆڵی دووەمی بۆ ئەهلی تۆمارکرد، بەڵام بە پاساوی ئۆفساید گۆڵەکە رەتکرایەوە.
یارییەکە بە سەرکەوتنی ئەهلی بە گۆڵێکی بێبەرامبەر کۆتاییهات، و بە پەنجا و یەک خاڵ لە بیست و شەش یارییدا لە پلەی سێیەمی ریزبەندییدا مایەوە.
سەرەڕای شکستەکەی، یانەی ئیتیحاد بە کۆکردنەوەی چل و شەش خاڵ لە بیست و شەش یارییدا لە پلەی چوارەمدا مایەوە.