رووداو-هەولێر
دانیێل ستۆریجی یاریزانی پێشووی یانەی لیڤەرپوولی ئینگلیزی و ئێستای یانەی تراپزۆن سپۆری تورکی بەهۆی تێوەگلان لە قومارکردنەوە سزاکەی قورسترکرا و بۆ ماوەی چوار مانگ لە یاریکردن سڕکرا.
دوای ئەوەی لە ماوەی رابردوو ستۆریج لەلایەن یەکێتیی تۆپی پێی ئینگلیزییەوە سزای شەش هەفتە سڕکردن و پێبژاردنی ٨٥ هەزار یۆرۆی بەسەردا سەپێنرا، بەڵام دواتر سزای ئەو یاریزانە قورسترکرا و بەڵگەی زیاتر لەدژی ئەو یاریزانە هەبوون کە قوماری نایاسایی لەسەر یارییەکان کردووە، ئەمەش بووە هۆی ئەوەی بە قورسی سزابدرێت و شەش مانگ لە هەموو چالاکییەکی تۆپی پێی لە سەرانسەری جیهان بێبەشکرا.
سزای ئەو یاریزانەی یانەی ترابزۆن سپۆر بەوەشەوە نەوەستا، بەڵکو بە رەزامەندی هەردوولا گرێبەستەکەشی لەگەڵ یانەی ترابزۆن هەڵوەشێنرایەوە و چیدیکە یاریزانی ئەو یانەیە نابێت.
ئەم سزایە لە کاتێکدایە کە دانیێل ستۆریجی تەمەن ٣٠ ساڵان سەرەتای ئەم وەرزە یانەی لیڤەرپوول جێهیشت و روویکردە یانەی ترابزۆن سپۆری تورکی کە گرێبەستەکەی بۆ ماوەی سێ ساڵ بوو، بەڵام هەڵوەشێنرایەوە.
ستۆریج لەگەڵ لیڤەرپوول شەش ساڵ درێژەی بە یاریکردندا و لە کۆی ١٦٠ یاریدا ٦٧ گۆڵی تۆمارکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ