رووداو دیجیتاڵ
سەرچاوە رۆژنامەڤانییەکانی ئیسپانیا ئاشکرایانکردووە، پەرچەکرداری دانی ئۆلمۆ، یاریزانی یانەی بارسێلۆنا، پاش رەتکردنەوەی تۆمارکردنی ناوی لە لیستی یانەکەی بۆ نیوەی دووەمی وەرزی ئەمساڵ، نیگەرانیی پێوە دیار بووە.
دەستەی لالیگا، ناوی هەریەکە لە دانی ئۆلمۆ و پاو ڤیکتۆری لە لیستی یاریزانانی بارسێلۆنا بۆ نیوەی دووەمی وەرزی ئەمساڵی لالیگا سڕییەوە، بەوەش ئەو یاریزانە ناتوانێت بەشداری لە یارییەکانی یانەکەی بکات و ئازاد دەبێت لە پەیوەندیکردن بەهەر یانەیەکی دیکەوە.
بارسێلۆنا لە دوایین رۆژی 2024دا هەوڵیدا ناوی ئۆلمۆ و ڤیکتۆر لە لیستەکەیدا تۆمار بکات، بەڵام بەهۆی یاسای دارایی یاریی خاوێنەوە، داواکارییەکەی رەتکرایەوە.
بڕیارەکە وەک شۆکێک لە کەتەلۆنیا و ئیسپانیا تەماشاکرا، کاردانەوەی تووندی لەلایەن ژمارەیەک هاندەری یانەکە بەدواداهات کە داوای دەستلەکارکێشانەوەی خوان لاپۆرتای سەرۆکی یانەکەیان کرد.
میدیای ئیسپانیا ئاشکرایانکرد، لاپۆرتا بەنیاز نییە بەهۆی رووداوەکەوە دەستلەکاربکێشێتەوە و دەیەوێت لەسەرۆکایەتیکردنی بارسێلۆنا بەردەوام بێت.
بەپێی ئەوەی میدیاکان بڵاویانکردووەتەوە، دانی ئۆلمۆ لە پاش تۆمارنەکردنی ناوی، ئێوارەی چوارشەممە رووی لە مەشقە بەکۆمەڵەکانی یانەکەی کردووە، بەرووخسارییەوە بێئومێدی بینراوە، هەروەها ئەو کەسانەی ئەویان بینیوە، هەستیان بەجۆرێک لە شڵەژان و بێزاریی ئەو کردووە.
رۆژنامەی 'ئەی ئێس'ی ئیسپانی دەڵێ، هەریەکە لە گابی، رافینیا و پێدری، بەتایبەت قسەیان لەگەڵ ئۆلمۆ کردووە و هانیانداوە بۆ ئەوەی بێئومێد نەبێت.
رۆژنامەکە دەڵێ، هانزی فلیکی راهێنەریش بەتایبەت قسەی لەگەڵ ئۆلمۆ کردووە.
بەپێی کاردانەوەکانی پاش بڕیاری تۆمارنەکردنی ناوی لە لیستی یانەکە، ئۆلمۆ سوورە لەسەر مانەوە لە بارسێلۆنا و نایەوێت لەو یانەیە بڕوات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ