رووداو دیجیتاڵ
هانزی فلیک، راهێنەری یانەی بارسێلۆنا، ئەو بۆچوون و قسانەی رەتکردەوە کە پێیانوابوو لەبەر گوشاری دەروونیی لە یارییەکانی رابردوودا بەشداریی بە رافینیا نەکردووە. ئەو راهێنەرە دەڵێ، یاریزانەکەم پێکانی هەبووە.
لە دوای بەشداریکردنی لە یاریی نێوان ئەرجەنتین و بەرازیل، لە پاڵاوتنەکانی مۆندیالی داهاتوو، رافینیا رووبەڕووی گوشاری زۆر بووەوە، بەهۆی ئەو لێدوانانەی بەر لە یارییەکە تێیدا گوتبووی، ئەرجەنتین تێکدەشکێنین و منیش گۆڵ تۆمار دەکەم.
یارییەکەی نێوان ئەرجەنتین و بەرازیل، بەسەرکەوتنی تانگۆ بە 4 - 1 گۆڵ کۆتاییهات و ئەوەش وایکرد، رافینیا رووبەڕووی رەخنە و گاڵتەکردنی زۆر ببێتەوە.
لە دوای گەڕانەوەی بۆ ئیسپانیا، رافینیا بەشداریی لە دوو یاریی رابردووی بارسێلۆنا بەرامبەر هەریەکە لە ئۆساسۆنا و جیرۆنا لە لالیگا نەکرد. هەندێک سەرچاوە گوتیان ئەوە مامەڵەی ژیرانەی فلیک بووە، بۆ ئەوەی ئەو یاریزانە لە گوشار دووربخاتەوە، بەڵام ئەو راهێنەرە خۆی ئەو لێدوانانە بەدرۆدەخاتەوە و دەڵێ، رافینیا ئازاری هەبووە.
بارسێلۆنا بە 4 - 1 لە جیرۆنای بردەوە لە گەڕی 29ی لالیگا، بەڵام رافینیا بەشداریی یارییەکەی نەکرد.
یاریینەکردنی فلیک بۆ دووەم یاریی لەسەریەک، پرسیاری لای رۆژنامەڤانان دروستکرد، بەڵام فلیک لە وەڵامی ئەواندا گوتی، لە نێوان هەردوو گێمی یارییەکەدا پرسیارم لێکرد لەبارەی ئامادەیی بۆ یارییکردن، بەڵام ئەو گوتی هەست بەکەمێک ئازار دەکات و هەر ئەوەش وایکرد لە یارییەکەدا بەشدار نەبێت.
راهێنەری بارسێلۆنا دەڵێ، "لەنێوان هەردوو گێمەکەدا قسەم لەگەڵدا کرد، ئەو زۆر راشکاوانە گوتی، هەست بەباشی ناکات، هەربۆیە بەشدارییم پێنەکرد و هیوادارم بۆ یاریی داهاتوو ئامادەبێت".
سەرچاوەکان پێشبینی دەکەن، رافینیا لە یاریی سبەی شەوی بارسێلۆنا بەرامبەر ئاتلێتیکۆ مەدرید لە پێشکۆتایی جامی شای ئیسپانیا بەسەرەکیی یاریی بکات.
ئەو سەرچاوانە دەڵێن، ئەو یاریزانە پێکانی نییە، بەڵام هەستی بەکەمێک ئازار کردووە کە بەهۆیەوە نەیتوانیوە بەئارامی یاریی بکات و باش رابکات، هەربۆیە لەلایەن فلیکەوە بەشداریی پێنەکراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ